स्वामी नारायण मन्दिरले भूकम्प पीडितलाई दियो २५ हजार पाउण्ड

लन्डन । नर्थ वेष्ट लन्डनको निज्डेनस्थित स्वामी नारायण मन्दिरले नेपालका भूकम्प पीडितका लागि २५ हजार पाउण्ड सहयोग प्रदान गरेको छ ।

शनिबार एक धार्मिक समारोहबीच कार्यवहाक नेपाली राजदूत तेजबहादुर क्षेत्रीले २५ हजार पाउण्डको चेक बुझेका हुन् ।

मन्दिरका टष्टी एपी पटेल र भिएच पटेलले उक्त रकम प्रदान गरेको कार्यवहाक राजदूत क्षेत्रीले वीनेपालीलाई जनाए ।

चेक ग्रहण गरेपछि क्षेत्रीले दाताहरुप्रति आभार व्यक्त गर्दै प्राप्त रकम सही सदुपयोग गरिने विश्वास दिलाएका थिए । क्षेत्रीले नेपाल पर्यटकका लागि सुरक्षित भएको अवगत गराउंदै भक्तजनहरुसमक्ष नेपाल भ्रमण गरिदिन अपिल समेत गरेका थिए । स्मरणरहोस्, नेपाल धार्मिक पर्यटनका लागि समेत गतिलो गन्तव्य मानिन्छ ।

लन्डन दूतावासले प्राप्त रकम प्रधानमन्त्री राहत कोषमा पठाउनेछ । यसअघि दूतावासले ५ करोड १५ लाख रुपैयां प्रधानमन्त्री राहत कोषमा पठाइसकेको छ । भूकम्प लगत्तै दूतावासमा आयोजित एक वृहत भेलाले नेपाल ब्रिटेन राहत तथा उद्दार कोष स्थापना गरेको थियो । भूकम्प पीडितलाई सहयोग जुटाउने क्रममा कार्यवहाक राजदूत क्षेत्रीको योगदान अहिले सर्वत्र प्रशंसनीय छ ।