अखिल (क्रान्तिकारी) को टोली लिपुलेक पुगेर फर्कियो

काठमाडौँ, १० भदौ । अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी)को टोली विवादित क्षेत्र लिपुलेक पुगेर फर्किएको छ ।

आज यहाँ आयोजित पत्रकार सम्मेलनमा क्रान्तिकारीका अध्यक्ष रत्न ढकालले गत साउन २३ गते काठमाडाँैबाट सुरु गरिएको काठमाडाँै–दार्चुला–लिपुलेक जागरण अभियान सफल भएको जानकारी दिए ।

गत जेठ १ गते भारतीय प्रधानमन्त्रीको तीन दिने चीन भ्रमणका बेला चीन र भारतका प्रधानमन्त्रीबीच ४१ वुँदे सहमतिको क्रममा नेपाली भूमि लिपुलेकका विषयमा गरेको सम्झौता खारेज गर्न दबाव दिने उद्देश्यले लिपुलेकयात्रा गरेको उनको भनाइ थियो ।

दुवै देशलाई खवरदारी गर्न, सरकारलाई दबाब सृजना गर्न, जनतामा सचेतना तथा जागरण पैदा गर्न र यो विषयलाई अन्तराष्ट्रियकरण गर्न अभियान सफल भएको अध्यक्ष ढकालले बताए ।

साउन २३ गते काठमाडाँैबाट दुई वटा बससहित ७१ जनाको टोली प्रस्थान गरेकोमा २६ गते दार्चुलाको सदरमुकाम खलङ्गामा युवा विद्यार्थीको मार्च पाससहित विशाल आमसभा सम्पन्न गरिएको थियो ।

अध्यक्ष ढकालको नेतृत्वमा सदरमुकाम खलङ्गाबाट साउन २७ गते उपाध्यक्ष वीरेन्द्र बस्नेत, खुशिराम चौधरी, सचिवहरू सुशिला चौधरी, कमल न्यौपानेसहित नौ जना र पाँच जना पत्रकारसहित गएकोमा ३२ गते लिपुलेक पुगेको थियो ।

टोली लिपुलेकमा पुगेर लिपुलेक नेपालको हो भन्दै खवरदारी कोणसभा तथा नारा जुलुस गरेको थियो ।

तुइन नदेखेकाले तुइन तर्नुपर्ने, भीरमा हिड्न नजानेकाले भीरैभीर, खोल्सा–खोल्सी हिड्नुपर्ने र अलिकति मात्रै चिप्लियो भने पनि महाकाली नदीको शिकार हुनुपर्ने जोखिम ठाउँ पार गर्दै आफूहरू लिपुलेक पुगेको पत्रकार सम्मेलनमा जानकारी दिइयो ।

भारतले लिपुलेक रहेको कालापानीलगायतका ३७ हजार हेक्टर जमिन अतिक्रमण गरेको उनले आरोप लगाए ।

नेपालको नाकामा छाङरुङ, टिङ्करमा भएको प्रहरी चौकी, जीर्ण अवस्थामा रहेको, पर्याप्त दरबन्दी नभएको र भएका पनि सबै उपस्थित हुन नसक्नेजस्ता समस्या आफूहरूले अभियानको क्रममा देखेको उनले जानकारी दिए ।

क्रान्तिकारीले नेपालस्थित भारत र चीनियाँ दुतावासमा ज्ञापनपत्र बुझाउने, संयुक्त राष्ट्र सङ्घको ध्यानाकर्षणको लागि पत्राचार गर्ने र कुटनैतिक पहलका लागि दबाब दिनेलगायत विभिन्न दबाबमूलक कार्यक्रम जारी राख्ने अध्यक्ष ढकालले जानकारी दिए ।