दशकपछि जुर्मुरायो नेपलिज आर्टिष्ट एसोसिएसन

लन्डन । एक जमाना बेलायतको नेपाली समुदायमा राम्रो प्रभाव पार्न सफल नेपलिज आर्टिष्ट एसोसिएसन यूके दशक अवधिको मौनतापछि फेरि जुर्मुराएको छ । एसोसिएसन नयां नेतृत्वसहित नयां योजनाका साथ अगाडि आउन लागेको हो ।

सन् १९९५, ९६ ताका स्थापित नेपलिज आर्टिष्ट एसोसिएसन यूके विवादका कारण केही समयपछि टुक्रिएर अर्को समानान्तर नेपाली कलाकार संघ गठन गरिएको थियो । विभाजनपछि दुवै संस्था निष्क्रिय थिए ।

तर, नेपलिज आर्टिष्ट एसोसिएसन यूके नयां कमिटीसहित सक्रिय हुने भएको हो । गत १६ अगष्टका दिन साउथ ह्यारोमा सम्पन्न भेलाले अजय शेखर प्रधानको अध्यक्षतामा नयां कार्यसमिति गठन भएको छ । अजय शेखर एसोसिएसनको संस्थापक अध्यक्ष हुन् ।

नवगठित कार्यसमितिको उपाध्यक्षमा ध्रुव दत्त, महासचिवमा देवानन्द सैंजु, कोषाध्यक्षमा सुमी राई, संगीत संयोजकमा सुनिल सुब्बा, रोशन गुरुङ र बत्सल तामाङ चुनिएका छन् । नृत्य संयोजकमा सुरेश श्रेष्ठ र गोपाल बस्नेत छानिएका छन् भने सदस्यहरुमा सुरेशराज पाठक, सुनिता गुरुङ, कुलदीप प्रधान, सुरेश वैद्य र हरि थापा चयन भएको अध्यक्ष प्रधानले जनाए ।

एसोसिएसनले डिसेम्बर दोश्रो सातातिर यूकेव्यापी नेपाली नृत्य प्रतियोगिता 
गर्ने भएको छ । यसअघि एसोसिएसनले वालवालिकाको नृत्य प्रतियोगिता गर्दथ्यो । नव निर्वाचित अध्यक्ष प्रधानले नेपाली कला संस्कृतिको जगेर्ना र नयां प्रतिभाहरुलाई अवसर प्रदान गर्न संस्था सक्रिय रहने बताए ।