भूपू गोर्खाको मुद्दाबारे बेलायत र नेपालबीच ८ जुनमा उच्चस्तरीय वार्ता हुने

लन्डन। समान पेन्सनलगायत मुद्दा उठाउँदै आएका भूपू गोर्खाको मुद्दाबारे बेलायत र नेपालबीच ८ जुनमा उच्चस्तरीय वार्ता हुने भएको छ ।

लन्डनस्थित नेपाली दूतावासमा विशेष बैठकको आयोजना गरिएको बेलायतका लागि नेपाली दूतावासका कार्यवाहक राजदूत विपिन दुवाडीले जानकारी गराउनुभएको हो । बैठक दिउँसो २:०० बजेदेखि ३:३० बजेसम्म चल्ने बैठकमा दुई देशबीचको आपसी सम्बन्ध र रक्षा लगायतका आपसी चासोका विषयहरू, भूपु गोर्खाहरूको मागको सम्बन्धमा महत्त्वपूर्ण छलफल गर्ने अपेक्षा दूतावास स्रोतले जनाएको छ ।

बैठकमा नेपाल र बेलायतका उच्च पदस्थ अधिकारीहरूको सहभागिता रहने जनाइएको छ। बेलायतका रक्षामन्त्री एवं सांसद जोन हेली, भेटेरान्स तथा नागरिक मामिलामन्त्री एवं सांसद लुइस स्यान्डर जोन्स भौतिक रूपमा उपस्थित हुने छन् ।

नेपालका परराष्ट्रमन्त्री शिशिर खनाल काठमाडौंबाट भर्चुअल माध्यम (अनलाइन) बाट जोडिने कावा राजदूत दुवाडीले जानकारी दिनुभयो । बैठकमा ‘जी १०’ का सदस्यहरूलाई समेत डाकिएको छ ।

बैठकमा तोकिएको समयभन्दा अगावै अर्थात् दिउँसो १:४० बजेभित्र नै दूतावासमा उपस्थित भइसक्न अनुरोध गरिएको छ ।