बेलायतमा नवनिर्वाचित काउन्सिलर कमलबहादुर गुरुङलाई तमु समाज यूकेको सम्मान

लन्डन । तमु समाज यूकेले नवनिर्वाचित काउन्सिलर कमलबहादुर गुरुङलाई सम्मान गरेको छ ।

आइतबार मे १७ मा लन्डनस्थित विम्बलीको बारहाम पार्कस्थित समाजको सामुदायिक भवनमा भएको १९ औं साधारणसभाको अवसरमा काउन्सिलर कमलबहादुर गुरुङ र उहाँकी पत्नी माया गुरुङलाई सम्मान गरिएको हो । तमु समाज यूकेका सल्लाहकार रहेका कमलबहादुर बेलायतमा ७ मेमा भएको स्थानीय निकायको निर्वाचनमा बरो अफ बार्नेटको बर्न्ट ओक वडाबाट पुनः काउन्सिलर पदमा निर्वाचित हुनुभएको हो ।

माया गुरुङ समाजको सल्लाहकार एवं आमा समूहकी पूर्वअध्यक्ष हुनुहुन्छ ।

कमलबहादुर दम्पतीलाई समाजकी अध्यक्ष विन्दु गुरुङ, संस्थापक अध्यक्ष चित्रहादुर गुरुङ तथा आमा समूहकी अध्यक्ष विमला गुरुङले खादा, फेटा र पुष्पगुच्छा प्रदान गरी सफल कार्यकालको शुभकामना व्यक्त गर्नुभएको थियो । साथमा उपस्थित सदस्यहरूले पनि खादा र पुष्पगुच्छामार्फत बधाई ज्ञापन गरेका थिए ।

लेबर पार्टीबाट निर्वाचित तथा पूर्वब्रिटिस गोर्खा सैनिकसमेत रहेका गुरुङको काउन्सिलरमा पुनः विजयीलाई नेपाली समुदायको गौरवका रूपमा लिँदै समाजले खुसी व्यक्त गरेको थियो ।

सम्मान ग्रहणपछि मन्तव्य व्यक्त गर्दै काउन्सिलर गुरुङले आफू र आफ्नो परिवारलाई प्रदान गरिएको सम्मानप्रति कृतज्ञता प्रकट गर्नुभयो । अघिल्लो निर्वाचनदेखि नै समाजबाट प्राप्त सहयोगको स्मरण गर्दै उहाँले यसपटक पनि समाजका सदस्यहरूले देखाएको सद्भाव, स्नेह र समर्थनका लागि धन्यवाद व्यक्त गर्नुभयो ।

उहाँले समाजबाट प्राप्त साथ, सम्मान र शुभेच्छाले आगामी कार्यकालमा जनमुखी सेवा गर्न थप प्रेरणा मिलेको उल्लेख गर्दै समुदायप्रतिको प्रतिबद्धता निरन्तर रहने विश्वास व्यक्त गर्नुभयो ।