बेलायतमा २४ औं गोर्खा कपमा ५६ टिम भिड्ने, ३ लाख ५० हजार पाउन्डभन्दा बढी खर्च हुने अनुमान

लन्डन । तमुधीं यूकेको आयोजनामा यही २४ मेमा हुने गोर्खा कपको २४ औं संस्करणमा ५६ टिम भिड्ने भएका छन् ।

मिचेटस्थित तमु धीं भवनमा आइतबार आयोजित पत्रकार सम्मेलनमा गोर्खा कप संयोजक एवं स्पोर्टस् सेक्रेटरी क्या. दीपक घलेले मेन ३८, भेट्रान १६ र महिला २ टिमले प्रतिस्पर्धा गर्ने जानकारी दिनुभएको हो । उहाँका अनुसार कार्यक्रममा ३ लाख ५० हजार ६५० पाउन्डभन्दा बढी खर्च हुने अनुमान छ ।

पत्रकार सम्मेलनमार्फत टिम ड्र समेत गरिएको छ ।

प्रतियोगिता क्वीन्स एभिन्यूमा २४ मे बिहान ९ बजेबाट सुरु हुनेछ । विजेतालाई ३ हजार ५ सय पाउन्ड, ट्रफी र सर्टिफिकेट, रनर अपले २ हजार पाउन्ड पुरस्कार पाउनेछन् । यस्तै भेट्रान विजेताले १ हजार ८ सय पाउन्ड साथै महिला टिम विजेता ६ सय पाउन्ड र रनरअपले ४ सय पाउन्ड पुरस्कार पाउने छन् ।

गोर्खा कप स्थलमा खाना, च्यारिटी, लत्ताकपडालगायत १२६ स्टल रहने जनाइएको छ ।

तमु धीं यूके अध्यक्ष जुमकाजी गुरुङले गोर्खा कपको तयारी लगभग सकिएको भन्दै उक्त दिन उपस्थित हुन बेलायतवासी नेपालीलाई अनुरोध गर्नुभयो ।

तस्बिर सौजन्य : मिनप्रसाद गुरूङ