गोरखाली समाज यूकेको अध्यक्षमा टकमाया गुरुङ निर्विरोध निर्वाचित

लन्डन । गोरखाली समाज यूकेको अध्यक्षमा टकमाया गुरुङ निर्विरोध निर्वाचित हुनु भएको छ ।

तेस्रो कार्यकालसम्म लगातार उपाध्यक्ष पदमा रहेर काम गरेकी गुरुङ अल्डरसटस्थित सुसिमोटो रेष्टुरेन्टमा सम्पन्न अधिवेशनबाट अध्यक्षमा चुनिनु भएको हो । उपाध्यक्ष हिमाला गुरुङ र राजेन्द्र गुरुङ, महासचिव धन दर्लामी मगर, सचिव मनबहादुर गुरुङ र कोषाध्यक्ष यशोदा ढकाल न्यौपाने चयन हुनुभएको छ ।

सदस्यहरूमा इन्दिरा दर्लामी, गंगा राना, होमाया गुरुङ, शकुन्तला गुरुङ, देव गुरुङ, विकास गुरुङ, मणिराज गुरुङ, गौतम गुरुङ, काजी गुरुङ, देव राना र विकास विक चुनिएको निर्वाचन समितिले जनाएको छ ।

नवनिर्वाचित कार्यसमितिलाई प्रमुख निर्वाचन अधिकृत भरत रोकाले पद तथा गोपनीयताको शपथग्रहण गराउनुभएको थियो । यस्तै निर्वाचन अधिकृत विष्णु तामाङले निर्वाचित पदाधिकारीहरूलाई प्रमाणपत्र तथा खादा प्रदान गरी सम्मान गर्नुभयो ।

अधिवेशनको पहिलो चरण तत्कालीन अध्यक्ष हेमकुमार गुरुङको अध्यक्षतामा सम्पन्न भएको थियो । कार्यक्रमको शुभारम्भ समाजका प्रमुख सल्लाहकार विष्णु तामाङ तथा बेलायत भ्रमणमा रहेका पूर्वप्रधानाध्यापक कृष्णप्रसाद ढकालले संयुक्त रूपमा पानसमा दीप प्रज्वलन गरी गर्नुभयो । कार्यक्रममा विभिन्न प्रतिवेदन प्रस्तुत गरी पारित गरिएको थियो ।

कार्यक्रमको अन्त्यमा नवनिर्वाचित अध्यक्ष टकमाया गुरुङले आफ्नो प्रतिबद्धता व्यक्त गर्दै सबैको सहयोग, सल्लाह र सुझावलाई आत्मसात् गर्दै समाजलाई अझ सशक्त, एकताबद्ध र सक्रिय रूपमा अगाडि बढाउने बताउनुभयो ।