भूतपूर्व गोर्खा समस्याबारे लन्डनमा सोमबार फेरि त्रिपक्षीय वार्ता हुने

लन्डन । भूतपूर्व गोर्खाहरुको विषयमा यही मार्च १६ तारिख सोमबार त्रिपक्षीय वार्ता हुने भएको छ ।

बेलायत, नेपाल सरकार र गोर्खा प्रतिनिधिबीच लन्डनस्थित बेलायती रक्षा मन्त्रालयमा वार्ता तय गरिएको हो । गत जनवरी २३ मा गोर्खाहरु समेतको सहमतिमा बेलायत सरकारसमक्ष प्रस्तुत गरिएको प्रस्तावमाथिको छलफलमा केन्द्रित हुने लन्डनस्थित नेपाली दूतावासले जनाएको छ ।

वार्तामा नेपाल सरकारको तर्फबाट नेतृत्व गर्दै आएका बेलायतका लागि नेपाली कार्यवाहक राजदूत विपिन दुवाडीले बेलायत सरकारलाई बुझाइएको प्रस्तावबारे उसको राय र धारणाबारे यो वार्तामा छलफल हुने जानकारी दिनुभयो ।

लामो समयदेखि जारी त्रिपक्षीय गोर्खा वार्ता मुख्यतः पेन्सनको मुद्धामा अड्किंदै आएको छ । पछिल्लोपटक बेलायत सरकार पेन्सनको ठाउँमा ‘अफोर्डेबल सोलुसन’का शीर्षकमा सहमति खोज्न तयार बनेपछि गोर्खाहरु समेतको सहमतिमा बेलायत सरकारसमक्ष ११ बुंदे प्रस्ताव पेश गरिएको छ । सन् २०१८ को प्राविधिक संयन्त्रको प्रतिवेदनकै मर्मअनुसार यो प्रस्ताव तयार गरिएको गोर्खाहरुले बताएका छन् ।