बेलायत सरकारद्वारा अध्यागमन नियममा व्यापक सुधारको घोषणा

लन्डन । बेलायत सरकारले अध्यागमन नियमहरूमा व्यापक सुधारको घोषणा गर्दै अब स्थायी बसोबासका लागि आवेदन दिने आप्रवासीहरूले अझै उच्चस्तरको अंग्रेजी बोल्न र बुझ्न सक्ने हुनुपर्ने नियम ल्याएको छ ।

‘अर्न्ड सेटलमेन्ट’ नाम दिइएको यस सुधार योजनाअन्तर्गत, बेलायती जीवनमा घुलमिल हुन र समाजमा योगदान पुर्‍याउन भाषाको दक्षतालाई मुख्य आधार बनाइएको छ। यो नियम मार्च २०२७ देखि पूर्ण रूपमा लागू हुनेछ। यस परिवर्तन अनुसार, अहिलेको जीसीएसईस्तरको साटो अब ‘ए-लेबल’ सरहको अंग्रेजी दक्षता आवश्यक पर्नेछ। यसमा पढ्ने, लेख्ने, बोल्ने र सुन्ने चारवटै पक्ष समावेश छन्। आप्रवासीहरूलाई तयारीका लागि एक वर्षको समय दिइएको छ।

विशेषज्ञहरूका अनुसार हालको स्तरबाट नयाँ स्तरमा पुग्न करिब २०० घण्टा थप अध्ययन आवश्यक पर्नेछ, जसको प्रमाण गृह मन्त्रालयले तोकेको केन्द्रबाट परीक्षा दिएर पेश गर्नुपर्नेछ। धेरैजसो आप्रवासीका लागि स्थायी बसोबास पाउने न्यूनतम समय ५ वर्षबाट बढाएर १० वर्ष पुर्‍याउने प्रस्ताव गरिएको छ भने डाक्टर र नर्सजस्ता फ्रन्टलाइन कर्मचारीहरूले ५ वर्षमा र उद्यमीहरूले ३ वर्षमै स्थायी बसोबासका लागि आवेदन दिन सक्नेछन्।

गृहमन्त्री शाबाना महमुदले भन्नुभयो- ‘बेलायतको इतिहासमा आप्रवासन सधैं महत्त्वपूर्ण रहेको छ, तर जनताको अपेक्षा के छ भने यहाँ आउनेहरू समाजमा घुलमिल हुन् र हाम्रो मूल्य-मान्यतालाई आत्मसात् गरून्। अंग्रेजी भाषाको निपुर्णता नै समाजमा जोडिने सबैभन्दा सजिलो बाटो हो।”

यो नियम मुख्यतया स्किल्ड वर्कर, पारिवारिक भिसा र अन्य व्यावसायिक भिसामा रहेका व्यक्तिहरूलाई लागू हुनेछ जो भविष्यमा बेलायतमा स्थायी रूपमा बस्न चाहन्छन् ।