नेपाली सेना दिवसको अवसरमा लन्डन दूतावासमा विशेष समारोह

लन्डन । नेपाली सेना स्थापना भएको २६३औँ वार्षिकोत्सवको अवसरमा बेलायतस्थित नेपाली दूतावास लन्डनमा विशेष समारोह आयोजना गरिएको छ ।

सोमबार १६ फेब्रुअरी २०२६ मा दूतावास परिसरमा विशेष समारोह आयोजना गरेको हो । बेलायतका लागि नेपाली कार्यवाहक राजदूत बिपिन दुवाडी र बेलायती सेनाका मेजर जनरल कार्ल बोसवेल सीबीईले संयुक्त रूपमा दीप प्रज्वलन गरी समारोह उद्घाटन गर्नुभयो ।

कार्यक्रममा बोल्दै कार्यवाहक राजदूत दुवाडीले नेपाली सेनाको गौरवपूर्ण इतिहास र राष्ट्रप्रति पुर्‍याएको योगदानको चर्चा गर्नुभयो । उहाँले सीमाको सुरक्षा, प्राकृतिक विपद्का बेला उद्धार तथा राहत कार्य, संयुक्त राष्ट्रसंघीय शान्ति मिसनमा सहभागिता लगायत क्षेत्रमा नेपाली सेनाले देखाएको व्यावसायिकता र समर्पणको प्रशंसा गर्नुभयो । देशको रक्षा गर्दै ज्यान आहुति दिएका वीर सैनिकप्रति उहाँले श्रद्धाञ्जली अर्पण गर्नुभयो ।

मेजर जनरल बोस्वेलले २६३औँ स्थापना दिवसको अवसरमा नेपाली सेनालाई बधाई दिँदै यसको इतिहास, अनुशासन र विश्वव्यापी प्रतिष्ठाको खुलेर प्रशंसा गर्नुभयो । उहाँले नेपाल–बेलायत सैन्य सम्बन्धलाई ‘अद्वितीय’ बताउँदै संयुक्त तालिम, विपद् व्यवस्थापन सहयोग, व्यावसायिक आदान–प्रदान र अन्तर्राष्ट्रिय शान्ति तथा स्थायित्वप्रतिको साझा प्रतिबद्धताले दुई देशबीचको सम्बन्ध अझ सुदृढ भएको उल्लेख गर्नुभयो । गोर्खा सैनिकहरू नेपाल–बेलायत मित्रताको जीवित प्रतीक भएको पनि उहाँले बताउनुभयो ।

यसअघि, सैनिक सहचारी ब्रिगेडियर जनरल अनुप शाहले अतिथिहरूलाई स्वागत गर्दै समारोहमा सहभागी भएकोमा धन्यवाद व्यक्त गर्नुभयो । कार्यक्रममा नेपाली सेनाका गतिविधिहरू झल्काउने भिडियो क्लिपहरू पनि प्रदर्शन गरिएको थियो ।

समारोहमा बेलायतस्थित उच्च सैनिक अधिकारी, विभिन्न देशका रक्षा सहचारी, सरकारी प्रतिनिधि तथा नेपाली समुदायका अगुवाहरूको उल्लेख्य उपस्थिति रहेको दूतावासले विज्ञप्तिमार्फत जनाएको छ ।