६ वर्षे एमबीबीएसको पूर्ण छात्रवृत्तिका लागि एनआरएनएद्वारा आवेदन आह्वान

लन्डन । गैरआवासीय नेपाली संघ (एनआरएनए)ले ६ वर्षे एमबीबीएसको पूर्ण छात्रवृत्तिका लागि आवेदन आह्वान गरेको छ ।

एनआरएनए र एशिया इन्टरनेशनल युनिभर्सिटी (एआईयू), उज्बेकिस्तानको संयुक्त सहकार्यमा दुई जना नेपाली विद्यार्थीहरूका लागि ६ वर्षे एमबीबीएस पाठ्यक्रममा पूर्ण छात्रवृत्ति प्रदान गर्ने घोषणालगत्तै यही डिसेम्बर २३ भित्र आवेदन बुझाउन आग्रह गरिएको हो । आवेदन गर्न इच्छुकको योग्यतामा नेपालमा सीईई परीक्षा पास गरेको हुनुपर्ने, जेहेन्दार तथा शैक्षिक रूपमा सक्षम र कमजोर आर्थिक अवस्था भएको विद्यार्थी हुनुपर्ने तोकिएको छ ।

परीक्षा मिति आगामी २०२६ जनवरी ३ गते पुल्चोक इन्जिनियरिङ् कलेजमा हुने एनआरएनएको सूचनामा उल्लेख छ । जेहेन्दार तथा विपन्न नेपाली विद्यार्थीहरूले https://dub.sh/nrnascholarship मा आवेदन दिन सकिने जनाइएको छ ।

छात्रवृत्ति प्राप्त दुई जना नेपाली विद्यार्थीले अध्ययन पूरा गरेपछि नेपाल फर्की न्यूनतम २ वर्षसम्म स्वास्थ्य क्षेत्रमा अनिवार्य सेवा प्रदान गर्नु पर्नेछ । छात्रवृत्ति प्राप्त विद्यार्थीको सम्पूर्ण खर्च (खाना, बसाइँ ) विश्वविद्यालयले बेहोर्ने पनि जनाइएको छ । यो पहलले नेपालमा स्वास्थ्य सेवा पहुँच विस्तार गर्न तथा स्वास्थ्यकर्मीको कमी सम्बोधन गर्न महत्वपूर्ण योगदान गर्ने अपेक्षा एनआरएनएको छ ।