नेपाल युके रनको पहलमा भ्यालेन्सिया म्याराथनमा सहभागी सन्तोषी श्रेष्ठको राष्ट्रिय कीर्तिमान

लन्डन । नेपाल युके रनको पहलमा भ्यालेन्सिया म्याराथनमा सहभागी सन्तोषी श्रेष्ठले राष्ट्रिय कीर्तिमान बनाउनुभएको छ । उक्त दौड विश्वकै प्रमुख म्याराथनमध्ये एक हो ।

‘गोल्डेन गर्ल’ धाविकाको परिचय बनाएकी श्रेष्ठले आइतबार ४२के भ्यालेन्सिया म्याराथनमा २ घण्टा ४० मिनेट २३ सेकेन्डमा म्याराथन पूरा गर्नुभउको हो । उहाँले गत वैशाखमा लन्डन म्याराथनमा आफैंले बनाएको २ घन्टा ४२ मिनेट ५० सेकेन्डको राष्ट्रिय कीर्तिमानमा सुधार गर्नुभएको हो ।

पेरिस ओलम्पिकको म्याराथन पूरा गरेकी सन्तोषीले बंगलादेशको बंगबन्धु म्याराथनमा २ घन्टा ४६ मिनेट २६ सेकेन्डको कीर्तिमान बनाएर आफ्नो म्याराथन यात्रा थाल्नुभएको थियो । भ्यालेन्सियामा विश्वभरका ८२ महिला एलिट रनरले प्रतिस्पर्धा गरेकामा सन्तोषीले ५८ औं स्थानमा रहेर दूरी पार गर्नुभयो । उहाँभन्दा पछाडि चार जना धाविकाले मात्र दुरी पार गरेका थिए भने अन्यले बीचमै दौड छाडेका थिए ।

गत असोजमा दिल्ली हाफ म्याराथनमा राष्ट्रिय कीर्तिमान बनाएकी सन्तोषीले कात्तिकमा साउथ एसियन सिनियर एथलेटिक्स च्याम्पियनसिपको ५००० मिटर र १०००० मिटर दौडमा राष्ट्रिय कीर्तिमानसहित दुई कांस्य पदक जित्नुभएको थियो । ग्लोबल स्पोर्ट्स कम्युनिकेसन नेदरल्यान्ड्सको फेलोसिपमा रहेकी सन्तोषीले भ्यालेन्सिया म्याराथनका लागि त्यहींको प्रशिक्षकबाट प्रशिक्षण लिनुभएको थियो ।

सन् २०१९ मा १३ औं दक्षिण एसियाली खेलकुदमा १० हजार मिटर दौडमा स्वर्ण जितेपछि उहाँ नेपाली एथलेटिक्समा छाइरहनुभएको छ ।