नेपालमा कार्की नेतृत्वको सरकारमा दुई मन्त्री थप

काठमाडौँ । नेपालकी प्रधानमन्त्री सुशीला कार्की नेतृत्वको सरकारमा दुई नयाँ मन्त्री थप भएका छन् ।

प्रधानमन्त्री कार्कीको सिफारिसमा आइतबार डा. सुधा शर्मा गौतम र बब्लु गुप्तालाई राष्ट्रपति रामचन्द्र पौडेलले मन्त्री नियुक्त गर्नुभएको हो । गौतमलाई स्वास्थ्य तथा जनसंख्या मन्त्रालय र गुप्तालाई युवा तथा खेलकुद मन्त्रालयको जिम्मेवारी दिइएको छ ।

नवनियुक्त मन्त्रीद्वयलाई आइतबार नै राष्ट्रपति भवन शीतल निवासमा आयोजित एक समारोहमा राष्ट्रपति पौडेलले पद तथा गोपनियताको शपथग्रहण गराउनुभएको छ ।

आजै सांस्कृतिक अभियन्ता गणपतिलाल श्रेष्ठ, दलित अभियन्ता खगेन्द्र सुनुवारलाई मन्त्रीमा सिफारिस गर्न चर्चा चले पनि उहाँहरुका विवाद बाहिरिएपछि अन्तिममा सूचीबाट हटाइएको थियो ।

७ असोजमा सर्वोच्च अदालतका पूर्वन्यायाधीश अनिलकुमार सिन्हा, म्यागासेसे पुरस्कार विजेता महावीर पुन, जलवायु तथा कृषि विज्ञ मदनप्रसाद परियार र पत्रकार जगदीश खरेल मन्त्री नियुक्त हुनुभएको थियो ।

जेन–जी आन्दोलनको बलमा तत्कालीन प्रधानमन्त्री केपी शर्मा ओलीले राजीनामा दिएपछि २७ भदौमा पूर्वप्रधानन्यायाधीश कार्की प्रधानमन्त्री बन्नुभएको थियो । त्यसअघि कार्कीले ३० भदौमा रामेश्वर खनाललाई अर्थमन्त्री, ओमप्रकाश अर्याललाई गृहमन्त्री र कुलमान घिसिङलाई भौतिक पूर्वाधारसहित ऊर्जामन्त्री बनाउनुभएको थियो ।