बेलायतवासी कवि दाहालको नयाँ कृति ‘एक अस्तित्व आलाप’ सार्वजनिक

लन्डन । अढाई दशकदेखि बेलायतमा बसोबास गर्दै साहित्य साधनामा संलग्न कवि मुकुल दाहाल (टंकप्रसाद दाहाल)को कवितासंग्रह ‘एक अस्तित्व आलाप’ लोकार्पण भएको छ ।

काठमाडौंको शिल्पी थियटरमा २० अक्टुबर २०२५ मा आयोजित कार्यक्रम कविहरू अविनाश श्रेष्ठ, मोमिला, शैलेन्द्र साकार, कृष्ण धरावासी, नारायण ढकाल र कुमार नगरकोटीले उक्त कवितासंग्रहको लोकार्पण गर्नुभएको हो । कार्यक्रममा विभिन्न कविहरूले कवि दाहालका कविता वाचन गर्नुभयो ।

कविता वाचनसँगै चालीसको दशकमा सँगै कविता लेख्दाका अनुभूतिलाई कवि श्रवण मुकारुङले साझीकरण गर्नुभयो । उहाँले भन्नुभयो, ‘हामीले चितवनको जंगल सफारीमा रातरातभरि दोहोरो कविता वाचन गर्दा मुकुलजी अब्बल बन्नुभएको थियो । तीस वर्षपछि पनि उहाँका कविता अझै जब्बर बनेर आएका रहेछन् ।’

कवि मोमिलाले दाहालको प्रेमपत्र शीर्षकको कविता वाचन गर्नुभयो भने कुमार नगरकोटीले कवि मुकुल दाहाललाई पहिलोपटक कथाकारको रूपमा समकालीन साहित्यमा पढेको स्मरण गर्दै ‘झ्याल’ शीर्षकको कविता वाचन गर्नुभयो ।

त्यसैगरी कवि भीष्म उप्रेतीले सँगै बिताएका स्कुल जीवनका संस्मरणहरू प्रस्तुत गर्दै दाहालकै कविता सुनाउनुभयो । त्यस्तै कवि विप्लव ढकालले पनि कवि दाहालका कवितामा कविताचेत र शक्ति भएको चर्चा गर्नुभयो ।

कार्यक्रममा आफू विदेशिँदाको कथालाई प्रस्तुत गर्दै कवि दाहालले आफ्ना तीन कविता वाचन गर्नुभएको थियो ।

दाहालको यसअघि ‘सीमा तीत सीमान्त’ कवितासंग्रह २०६१ सालमा प्रकाशन भएको थियो । चार दर्जन कविताहरूको संग्रह ‘एक अस्तित्व आलाप’लाई बुकहिलले बजारमा ल्याएको हो ।