बेलायतवासी आङ्बुहाङको काठमाडौंमा रहेको जग्गा नक्कली धनीपुर्जा बनाएर बेच्न खोज्ने तीन पक्राउ

लन्डन । काठमाडौं बूढानीलकण्ठ नगरपालिका–४ पासिकोटमा रहेको २ रोपनी ६ आना जग्गा नक्कली धनीपुर्जा बनाएर बेच्न खोजेको आरोपमा तीन जना पक्राउ परेका छन् । पक्राउ पर्नेहरूमा सिन्धुपाल्चोकको बाह्रबिसे नगरपालिका–६ घर भएका ५८ वर्षीय सुक्रबहादुर शेर्पा, जुगल गाउँपालिका–३ घर भई काठमाडौंको गोकर्णेश्वर नगरपालिका–१ बस्ने ४८ वर्षीय दावा दोर्जे तामाङ र रामेछापको सुनपाती गाउँपालिका–२ घर भई कागेश्वरी मनोहरा नगरपालिका–६ बस्ने ५८ वर्षीय भुपाल सिं तामाङ छन् । उनीहरूलाई प्रहरी वृत्त गौशालाले पक्राउ गरेर अनुसन्धान अघि बढाएको जनाएको छ ।

सुक्रबहादुरलाई १५ माघमा, भुपाल र दावालाई २८ माघमा पक्राउ गरिएको जिल्ला प्रहरी परिसर काठमाडौंका एसएसपी रमेश थापाले जानकारी दिएका छन् । यो समूहले बेलायतमा बस्दै आएका ईश्वर आङ्बुहाङको नाममा रहेको पासिकोटको २ रोपनी ६ आना जग्गा नक्कली धनीपुर्जा बनाई बेच्न खोजेको पाइएको एसएसपी थापाले बताए ।

ताप्लेजुङको आठराई त्रिवेणी गाउँपालिका–३ घर भएका आङ्बुहाङ पछिल्लो समय बेलायत बस्दै आएका थिए । मालपोत कार्यालय चाबहिलमा दर्ता श्रेस्ता कायम रहेको बूढानीलकण्ठ पासिकोटको कित्ता नम्बर ४६ को २ रोपनी ६ आना जग्गा उनै आङ्बुहाङको नाममा थियो । बूढानीलकण्ठ जस्तो ठाउँमा लामो समयसम्म जग्गा खाली रहेको जानकारी पाएपछि यो समूहले जग्गाको निगरानी बढायो । र, जग्गाधनी पहिल्याएको थियो । जग्गाधनी बेलायत रहेको सूचना पाएपछि नक्कली जग्गाधनी बनेर जग्गा बेच्ने योजना यो समूहले बनाएको एसएसपी थापा बताउँछन् । त्यसका लागि उनीहरूले आङ्बुहाङको नाममा नक्कली नागरिकता बनाउने र त्यसमार्फत आफू नै जग्गाधनी भएको भन्दै हराएको बताएर प्रतिलिपि धनीपुर्जा निकाल्ने योजना बनाए । त्यसपछि सुक्रबहादुरलाई आङ्बुहाङ बनाएर नक्कली नागरिकता बनाइयो । अनि त्यही नागरिकताका आधारमा प्रतिलिपि लाजपुर्जा निकाल्ने, राष्ट्रिय परिचयपत्र बनाउने, प्यान कार्ड बनाउने, बैंक खाता खोल्नेसम्मका कामहरू भएको अनुसन्धानबाट खुलेको छ ।

ईश्वर आङ्बुहाङको नामको नक्कली नागरिकता बनाएपछि त्यसैको प्रतिलिपि लालपुर्जा उपलब्ध गराई पाउँ भन्दै निवेदन दिइएको थियो । अनि लालपुर्जा समेत निकालिएको पाइएको छ । यो जग्गा हालको मूल्यअनुसार करिब १८ करोड पर्न आउने प्रहरी स्रोत बताउँछ । यसरी सक्कली जग्गाधनी बनेर लालपुर्जा निकाल्ने व्यक्ति हुन्, अहिले पक्राउ परेका सुक्रबहादुर । यसका मुख्य योजनाकार भने दावा हुन् । दावाले सिकाएअनुसार सुक्रबहादुरले वास्तविक आङ्बुहाङ बनेर लालपुर्जा समेत निकालेका थिए । योजनाकार दावा भने मालपोत कार्यालयमा पेश भएका लिखतहरूमा भने ‘फुरी शेर्पा हुँ’ भन्दै साक्षी बसेका थिए ।

अर्का योजनाकार भुपाल भने ‘जग्गाधनी कोही छैन, आफैं जग्गा धनी हो’ भन्दै चाबहिल मालपोत कार्यालयमा सुक्रबहादुर उपस्थित गराउने व्यक्ति हुन् । उनीहरूबाट प्रहरीले विभिन्न व्यक्तिका नामको जग्गाधनी पुर्जा, लिखत कागजातहरू, ३ थान मोबाइल, ईश्वर आङ्बुहाङको नामको नक्कली नागरिकता, झुटा विवरणको आधारमा तयार पारिएको राष्ट्रिय परिचयपत्र, बूढानीलकण्ठ नगरपालिका–४ को जग्गाधनी पुर्जाको प्रतिलिपि लिन दिइएको सिफारिस र ३ लाख ४० हजार बरामद गरेको छ ।

अनलाइन खबरको सहयोगमा ।