बेलायतमा ब्ल्याकवाटर भ्याली रनर्स र जीआरएनसीको आयोजनामा दौड सम्पन्न [तस्बिरहरु]

लन्डन । बेलायतमा ब्ल्याकवाटर भ्याली रनर्स र ग्रेटर रसमुर नेपाली कम्युनिटी (जीआरएनसी) युकेको आयोजनामा गत वर्षझैं अक्टोबर ५ मा रश्मूर वेलेस्ली १० किमि दौड,५ किमिको गोर्खा भीसी दौड र २ किमिको फन रन सम्पन्न भएको छ ।

अल्डरसट क्विन्स एभिन्यूको रग्बी स्टेडियममा रश्मूर वेलेस्ली दौड प्रतियोगितामा भएको हो । जीआरएनसीकी अध्यक्ष लिला सेलिङ माबोले घन्टी बजाएर बिहान सुरु गरेको १० किमि दूरीको दौड सोही ठाउँमा फर्किएर पूरा भएको थियो । दौड पूरा गर्नेहरु सबैलाई मेडल प्रदान गरिएको थियो ।

१० किमि रश्मूर वेलेस्ली दौड प्रतियोगिताको अफिसियल स्पोन्सर सूर्य गुरुङ नेतृत्वको पिपल मोर्गेज थियो ।

दौड सुरु हुनुअघि सहभागी धावकहरूलाई धावनमार्ग, स्वास्थ्य सुरक्षा र सावधानीबारे जानकारी दिइएको थियो । रेस डाइरेक्टर ब्ल्याक भ्याली रनर्सका डेव पोर्टर र महासचिव स्टिभ रहनुभएको थियो । प्रतियोगितामा रश्मूर बरो काउन्सिलले सहयोग गरेको थियो । रेसबाट संकलित रकममध्ये केही अंश स्थानीय च्यारिटी संस्थालाई र केही जीआरएनसीलाई प्रदान गरिने आयोजक जीआरएनसी यूकेकी अध्यक्ष माबोले जानकारी दिनुभयो । दौडमा करिब ६०० जना सहभागी थिए ।