नेपालमा जेनजी आन्दोलन : नेपाली दूतावास लन्डन परिसरमा श्रद्धाञ्जलीसभा

अब इमान्दारिताका साथ नेपालको मुहार फेर्न योगदान गर्न बेलायतमा रहेका नेपालीलाई आग्रह

लन्डन । प्रेम गाहामगर नेतृत्वको गैर आवासीय नेपाली संघ बेलायत (एनआरएनए यूके)ले जेनजी युवाहरुको निधनप्रति श्रद्धाञ्जली अर्पण गर्न नेपाली दूतावास लन्डनमा सभा आयोजना गरेको छ ।

संघले बिहीबार लन्डनस्थित नेपाली दूतावास परिसरमा दीप प्रज्वलन गर्दै मृतात्माको चीरशान्तिको कामनासहित श्रद्धाञ्जली अर्पण गरेको हो । नेपालमा भ्रष्टाचार, कुशासन र सामाजिक सञ्जाल प्रतिबन्धविरुद्ध प्रदर्शनका क्रममा जेनजी युवा, प्रहरी, कैदीसहित ५० जना भन्दा बढीको मृत्यु भइसकेको छ । सुरक्षाका कारण करिब तीसजनामात्र उपस्थित उक्त सभाका सहभागीले जेनजी शहीदहरुप्रति पुष्पगुच्छा अर्पण गरि एकमिनेट मौनधारण समेत गरेका थिए ।

स्मृतिसभामा राजदूत चन्द्रकुमार घिमिरेले दिवंगत जेनजी युवाहरुप्रति श्रद्धाञ्जली अर्पण गर्दै नेपालीहरु जस्तोसुकै कठिन अवस्थामा पनि भावनात्मक रुपमा एक भएर उभिने गरेको उल्लेख गर्नुभयो । उहाँले बेलायतमा रहेका नेपालीलाई अब इमान्दारिताका साथ नेपालको मुहार फेर्न योगदान गर्न आग्रह गर्नुभयो । प्रदर्शनमा सदादत प्राप्त गरेका युवाहरुको सपना साकार पार्न नेपाल र नेपालीको मुहार फेरे त्यो सच्चा श्रद्धाञ्जली हुने पनि उहाँले बताउनुभयो ।

संघका अध्यक्ष प्रेम गाहामगरले युवामाथि प्रहरी दमन र हत्याको विरोध गर्दै श्रद्धाञ्जली अर्पण गर्नुभयो । उहाँले नेपालमा व्याप्त भ्रष्टाचार अन्त्य र सुशासनका लागि युवाहरुले गरेको प्रदर्शनप्रति ऐक्यबद्धता एवं कृतज्ञता समेत व्यक्त गर्नुभयो ।

अध्यक्ष गाहामगरले सोही सभामा ‘सेभ द नेशन, बिल्ड द नेशन’ भन्ने अभियान सुरु गरिएको घोषणा गर्दै यस अभियानमा कुनै जातजाती, धर्म वा संस्था नभनि एक नेपाली नागरिकका हैसियतमा जोडिन विश्वभरका नेपालीसमक्ष अपिल गर्नुभयो । उहाँले नयाँ नेपाल निर्माणका लागि अब फुटेर होइन जुटेर विदेशस्थित सबै नेपालीको योगदान आवश्यक रहेको पनि बताउनुभयो ।

कार्यक्रम महासचिव जुरेन्द्र खजुमले सञ्चालन गर्नुभएको थियो ।