चर्चित गायिका इन्दिरा गोलेको ५९ वर्षको उमेरमा निधन

काठमाडौं । चर्चित लोकदोहोरी तथा सेलो गायिका इन्दिरा गोले गुरुङको ५९ वर्षको उमेरमा निधन भएको छ । मंगलबार राति १२ बजेतिर ललितपुरको हात्तीवनस्थित अपार्टमेन्टमा निधन भएको पारिवारिक स्रोतलाई उद्धृत गर्दै गायक फूलकुमार बम्जनले जानकारी गराउनुभयो ।

इन्दिरा केही वर्षदेखि क्यान्सर रोगसँग लड्दै आउनुभएको थियो । इन्दिरा ललितपुरको कोन्ज्योसोम गाउँपालिका-५ भारदेउमा २०२३ कात्तिक ३ गते जन्मिनुभएको थियो । उहाँले राष्ट्रिय गीत, लोकगीत, आधुनिक गीत, तामाङ सेलो मात्र नभएर सुदूर पश्चिमको देउडा, मध्य पश्चिमेली दोहोरी, पूर्वेली, काठे दोहोरी गरी ५ हजारभन्दा बढी गीत गाउनुभयो ।

२०४५ सालमा रेडियो नेपालबाट गीत रेकर्ड गर्ने अवसर पाएपछि उहाँ केही समय अघिसम्म गीत संगीत क्षेत्रमा व्यस्त हुनुहुन्थ्यो । उहाँको आजै बौद्ध परम्पराअनुसार अन्त्येष्टी गर्ने तयारी छ । उहाँका दुई छोरी हुनुहुन्छ ।

गजल गायन समेत गर्नुभएकी इन्दिराले ‘मयुङ बुरिङ’, ‘चाङ छार’, ‘सेमला दुङाल’लगायत तामाङ भाषाको चलचित्रमा समेत स्वर दिनुभयो । उहाँले रेडियो नेपालमा ‘हातमा हँसिया कम्बरमा खुर्पेटो’ (२०४५) गीत गाउनुभयो । इन्दिराका ‘चाँगु नारायण’, ‘पेमास्या’ (२०५८), ‘तामाङ व्हाइ’, ‘हाम्रो डम्फु सेलो’, ‘होइसेर’, ‘सफा टेम्पुरि’, ‘नाच्यो माइच्याई’ तिमी डम्फुको तालैमा’ लगायतका दनौं गीत चर्चामा छ ।

उहाँले ‘सुलभ तामाङ सङ्गीत तथा नाट्य प्रज्ञा पुरस्कार २०११’ लगायतका कैयौं मानसम्मान र पुरस्कार प्राप्त गर्नुभयो । उहाँले नेपाल तामाङ कलाकार सङ्घका अध्यक्ष (२०७२–२०७६) रहेर सङ्घको उत्थान र विस्तारमा पनि भूमिका निर्वाह गर्नुभयो ।