टेक्सासमा बाढीका कारण ज्यान गुमाउनेको सङ्ख्या १०० नाघ्यो, उद्धार कार्य जारी

न्यूयोर्क । टेक्सासमा विनाशकारी बाढीबाट मर्नेहरूको सङ्ख्या सोमबार एक सयभन्दा बढी पुगेको छ । उद्धारकर्ताहरूले पानीको धारले बगाएका मानिसहरूको खोजी जारी राखेका छन् ।
मृतकमध्ये कम्तीमा २७ जना बालबालिका र सल्लाहकारहरू थिए । उनीहरू जुलाईको चौथो बिदाको सप्ताहन्तमा प्रकोप हुँदा नदीको किनारमा रहेको युवा ग्रीष्मकालीन शिविरमा बसिरहेका थिए ।
पूर्वानुमानकर्ताहरूले जलमग्न जमिनमा वर्षा हुँदा थप बाढीको चेतावनी दिएका छन् । वर्षाले हेलिकप्टर, डुङ्गा, कुकुर र करिब एक हजार सात सय ५० जना कर्मचारी समावेश भएको उद्धार प्रयासलाई जटिल बनाएको छ । “अझै पनि बाढी निम्त्याउने सम्भावनासहित भारी वर्षाको खतरा छ”, टेक्सासका गभर्नर ग्रेग एबोटले सोमबार एक विज्ञप्तिमा भन्नुभयो । पीडितहरूको सङ्ख्या अझै बढ्ने अनुमान गरिएको छ ।
राष्ट्रपति डोनाल्ड ट्रम्पले शुक्रबार टेक्सास भ्रमण गर्ने योजना बनाएको पुष्टि गर्नुभयो । ह्वाइट हाउसले आलोचकहरूलाई मौसम एजेन्सीहरूमा उहाँको कटौतीले चेतावनी प्रणालीलाई कमजोर पारेको दाबी गरेको थियो । “यी बाढीका लागि राष्ट्रपति ट्रम्पलाई दोष दिनु एउटा गलत हो र राष्ट्रिय शोकको यस समयमा यसले कुनै उद्देश्य पूरा गर्दैन”, प्रेस सचिव क्यारोलिन लेभिटले सोमबार पत्रकारहरूलाई भन्नुभयो ।
शुक्रबार बिहान आएको बाढीलाई ट्रम्पले ‘एक सय वर्षको प्रकोप’ भन्दै यसलाई ‘कसैले पनि अनुमान नगरेको’ बताउनुभयो । यसअघि विपद् राहतलाई राज्य स्तरमा सञ्चालन गर्नुपर्ने भन्दै राष्ट्रपतिले नयाँ सङ्घीय कोष सक्रिय गर्ने र स्रोत मुक्त गर्ने प्रमुख विपद् घोषणामा हस्ताक्षर गर्नुभएको छ ।