बेलायतका पहिलो नेपाली डेपुटी लर्ड लेफ्टिनेण्ट मणिकुमार राईको निधन

लन्डन । बेलायतका पहिलो नेपाली डेपुटी लर्ड लेफ्टिनेन्ट मेजर (सेवानिवृत्त) मणिकुमार राई एमबीई डीएलको निधन भएको छ ।

मणिकुमारको २८ मे २०२५ मा आफ्नै निवास क्याम्बर्लीमा निधन भएको हो । उहाँ लामो समयदेखि क्यान्सर रोगबाट पीडित हुनुहुन्थ्यो । उहाँलाई २०२० अक्टोबरमा उनलाई ह्याम्पसायर काउन्टीको डिपुटी लर्ड लेफ्टिनेन्ट पदमा नियुक्त गरिएको थियो । यो पद पाउने पहिलो नेपाली मूलका नागरिक उहाँ बन्नुभएको थियो ।

मेजर राई सन् १९७२ मा ब्रिगेड अफ गोर्खाजमा भर्ती हुनुभएको थियो । प्रारम्भमा ७ गोर्खा राइफल्समा सेवा गरेपछि, सन् १९७४ मा रोयल मिलिटरी एकेडेमी स्यान्डहर्स्टबाट अफिसरको रुपमा कमिसन पाई ६ गोर्खा राइफल्समा नियुक्त हुनुभएको थियो ।

उहाँले पल्टनमा प्लाटुन कमान्डर, एजिटेन्ट, कम्पनी कमान्डर र बटालियन सेकेन्ड-इन-कमान्डजस्ता भूमिका निर्वाह गर्नुका साथै विभिन्न स्टाफ अफिसरका रुपमा रक्षा मन्त्रालय, ७ आर्मर्ड ब्रिगेड तथा स्यान्डहर्स्ट एकेडेमीमा सेवा गर्नुभयो । सन् १९९१ मा इराक युद्धमा खटिएका उहाँलाई वीरता र सेवाका लागि एमबीई पदक प्रदान गरिएको थियो ।

उहाँ ४२ वर्षको सैन्य सेवापश्चात् २०१४ मा पूर्णरूपमा सेवा निवृत्त हुनुभएको थियो । उहाँले सेवा निवृत्तिपछिको सामाजिक र व्यावसायिक योगदान उल्लेखनीय रुपमा दिनुभएको थियो ।