जीआरएनसी यूकेको अध्यक्षको जिम्मेवारी अब लिला सेलिङ माबोलाई

लन्डन । ग्रेटर रस्मूर नेपाली कम्युनिटी (जीआरएनसी) यूकेको अध्यक्षको जिम्मेवारी लिला सेलिङ माबोलाई दिइएको छ ।

अल्डरसटस्थित जीआरएनसीको हलमा आइतबार १८ मे २०२५ मा आयोजित पद हस्तान्तरण र ग्रहण कार्यक्रममा आलोपालो नेतृत्व लिने सहमतिअनुरुप अध्यक्ष मान गुरुङले अर्की अध्यक्ष लिला सेलिङ माबोलाई जिम्मेवारी सुम्पिनुभएको हो । डेढ वर्षअघि १० नोभेम्बर २०२३ मा भएको जीआरएनसी यूकेको अधिवेशनबाट आलोपालो नेतृत्वका लागि मान गुरुङ र लीला सेलिङ माबो अध्यक्षमा चयन हुनुभएको थियो ।

अध्यक्ष गुरुङले पूर्वसहमतिअनुसार १८ महिना कार्यभार सम्हाल्ने पछि माबो अध्यक्षको जिम्मेवारी हस्तान्तरण गर्नुभएको हो । माबोले अब १८ महिना जीआरएनसीको नेतृत्व गर्नुहुनेछ ।

कार्यसमितिको ४ उपाध्यक्षमा सुष्मा गुरुङ (महिला), उत्तर गुरुङ, डा.विशाल गुरुङ र जीत मेन्याङ्बो हुनुहुन्छ । यस्तै महासचिवमा सुनील राना रहनुभएको छ । कोषाध्यक्षमा श्याम श्रेष्ठ, सहकोषाध्यक्षमा सुमन पुन, मिडिया सेक्रेटरीमा गोर्खा मिडियाका प्रबन्ध निर्देशक मिलन तमु, सदस्यहरुमा गोमा राना, हेमकुमार गुरुङ, नारायण गिरीलगायत हुनुहुन्छ ।

अध्यक्ष मान गुरुङको अध्यक्षतामा भएको ह्यान्डओभर एन्ड टेकओभर कार्यक्रममा स्वास्थ्य तथा सुरक्षाबारे सचिव प्रजेश श्रेष्ठले जानकारी दिनुभएको थियो । महासचिव सुनिल रानाले सञ्चालन गर्नुभएको कार्यक्रममा उपाध्यक्ष डा विशाल गुरुङले स्वागत मन्तव्य राख्नुभयो भने अध्यक्ष मान गुरुङले आफ्नो कार्यावधिमा भएका उपलब्धिबारे जानकारी गराउनुभयो ।