नेपाली विद्यार्थीको शव नेपाल पठाउन रास्वपा यूकेको सहयोग संकलन अभियान

लन्डन । लन्डनस्थित थेम्स नदीमा मृत भेटिएका नेपाली विद्यार्थीको शव नेपाल पठाउन राष्ट्रिय स्वतन्त्र पार्टी प्रवास नेपाली सम्पर्क विभाग (रास्वपा यूके) ले सहयोग संकलन अभियान सञ्चालन गरेको छ ।

रुकुम पश्चिमको मुसिकोटका सुशन ओलीको शव नेपाल पठाउन आर्थिक समस्या देखिएपछि रास्वपा यूकेले क्राउडफन्डर डट सीओ डट यूके अनलाइन प्लाटफमममार्फत सहयोग संकलन गरेको हो । शुक्रबार ९ मे २०२५ बेलुकीसम्म ८ हजार ६ सय ३६ पाउन्ड संकलन भएको छ । जसमा ५ सय १० जनाले सहयोग गरेका छन् ।

शव नेपाल पठाउने जहाज भाडा, कानुनी कागजात मिलाउने, अन्त्येष्टिलगायत खर्चका लागि अभियानमार्फत ७ हजार पाउन्ड उठाउने लक्ष्य राखिएको थियो ।

सुशनको शव अप्रिल २८ मा लन्डन थेम्स नदीमा फेला परेको बेलायती प्रहरीलाई उदृत गर्दै लन्डनस्थित नेपाली दूतावासले पुष्टि गरेको थियो । बेलायतको कोभेन्ट्री विश्वविद्यालयमा बिजनेश म्यानेजमेन्ट एन्ड लिडरसीप कोर्समा ब्याचलर्स दोस्रो वर्ष पढ्ने तयारी गरिरहेका रुकुम पश्चिम मुसीकोट नगरपालिका–१२ का २० वर्षीय ओली अप्रिल २१ तारिख (वैशाख ८) देखि सर्म्पकविहीन थिए । सुशन कोभेन्ट्री युनिभर्सिटीमा अध्ययनका लागि करिब एक वर्षअघि मात्रै बेलायत आएका थिए ।