काठमाडौँ । गैरआवासीय नेपाली संघ (एनआरएनए)को एकता महाधिवेशनबाट निर्वाचित महेशकुमार श्रेष्ठ नेतृत्वको नयाँ कार्यसमितिले शपथ लिएको छ ।
पूर्वप्रधानमन्त्री एवं नेपाल कम्युनिष्ट पार्टी (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’लगायतको उपस्थितिमा आइतबार आयोजित समारोहमा प्रमुख निर्वाचन आयुक्त गोपालकृष्ण घिमिरेले नयाँ कार्यसमितिलाई पद तथा गोपनीयताको शपथ खुवाउनुभएको हो । एनआरएनए उच्चस्तरीय समितिद्वारा ३-४ मे २०२५ मा काठमाडौँमा आयोजित महाधिवेशनबाट अध्यक्षमा श्रेष्ठ, उपाध्यक्षमा खगेन्द्र न्यौपाने, लोकप्रसाद दाहाल, सुनिलकुमार शाह, मनोजकुमार श्रेष्ठ, विश्वासदीप तिगेला लिम्बू, बुद्धिसागर सुवेदी र जानकी गुरुङ चयन हुनुभएको छ ।
त्यस्तै महासचिवमा बाबुराम लामा, सचिवमा टंकप्रसाद गैरे, चिन्तामणि सापकोटा, तिलकप्रसाद गैरे र देवकी खत्री गुरुङ निर्वाचित हुनुभयो । कोषाध्यक्षमा ठाकुरप्रसाद ढुङ्गाना, सहकोषाध्यक्ष माकृष्णप्रसाद पोखरेल, महिला संयोजकमा रश्मी थापा, युवा संयोजकमा भीमसेन थापा चयन भएको निर्वाचन समितिले जनाएको छ । महाधिवेशनले क्षेत्रीय संयोजक र उपसंयोजक पनि चयन गरेको छ । जसमा एसिया प्रशान्तको संयोजक डा. बलराम श्रेष्ठ, युरोपमा प्रेमबहादुर गुरुङ, मध्यपूर्वमा रमेश श्रेष्ठ, उत्तर दक्षिण अमेरिकामा ढिलुराम पराजुली, ओसियानामा इर्सद अहमद रहनुभएको छ ।
कार्यक्रममा सम्बोधन गर्नुहुँदै अध्यक्ष प्रचण्डले सुशासन, सामाजिक न्याय र समृद्धिको पक्षमा काम गर्नुपर्ने आवश्यकता औँल्याउनुभयो । उहाँले आफ्नै नेतृत्वको सरकारले एनआरएनएलाई नागरिकता प्रदान गरेको उल्लेख गर्दै थप हितका निम्ति आफूले सक्दो प्रयास गर्ने प्रतिबद्धतासमेत व्यक्त गर्नुभयो । अध्यक्ष दाहालले गैरआवासीय नेपालीको ज्ञान सीप नेपालको हितमा प्रयोग गर्न आग्रह गर्नुभयो ।
