बेलायती राजा चार्ल्स तृतीयसमक्ष नेपाली राजदूत घिमिरेद्वारा ओहोदाको प्रमाणपत्र पेस

लन्डन । संयुक्त अधिराज्य (बेलायत)का राजा चार्ल्स तृतीयसमक्ष नेपाली राजदूत चन्द्रकुमार घिमिरेले आफ्नो ओहोदाको प्रमाणपत्र प्रस्तुत गर्नुभएको छ ।

बिहीबार बकिङ्घम दरबारमा एक औपचारिक कार्यक्रमबीच राजदूत घिमिरेले चार्ल्सलाई ओहोदारको प्रमाणपत्र पेस गर्नुभएको हो । त्यस अवसरमा उहाँले नेपालका राष्ट्रपति रामचन्द्र पौडेल र प्रधानमन्त्री केपी शर्मा ओलीको शुभकामना सन्देश पनि सुनाउनुभयो ।

सो अवसरमा राजा चार्ल्सले राजदूत घिमिरेलाई उहाँको नियुक्तिप्रति बधाई दिनुहुँदै नेपालसँगको द्विपक्षीय सम्बन्ध सुदृढ पार्न बेलायती प्रतिबद्धता व्यक्त गर्नुभयो ।

राजदूत घिमिरेले नेपाल र बेलायतबीचको दुई शताब्दीभन्दा लामो अटल मित्रतामा जोड दिँदै नेपालको सामाजिक-आर्थिक विकास पहलहरूमा बेलायतको निरन्तर सहयोगका लागि कृतज्ञता व्यक्त गर्नुभयो। उहाँले पारस्परिक हितका क्षेत्रमा सहकार्य थप बढाउने नेपालको प्रतिबद्धता पनि दोहोर्‍याउनुभयो।

समारोहमा राजदूत पत्नि सरिता न्यौपाने घिमिरे र दूतावासका कर्मचारी पनि सहभागी हुनुहुन्थ्यो ।