अनलाइन आत्महत्या फोरमको जाँच गर्दै बेलायतको नियामक

लन्डन । बेलायतको प्रसारण नियामकले बुधबार एक अनलाइन आत्महत्या फोरमको जाँच गरिरहेको घोषणा गरेको छ ।

उक्त फोरमलाई स्थानीय सञ्चार माध्यमहरूका अनुसार देशमा कम्तीमा ५० जनाको मृत्युसँग जोडिएको बताइएको छ ।अफकमले यस साइटको सेवा प्रदायकले ‘आफ्ना बेलायती प्रयोगकर्ताहरूलाई गैरकानूनी सामग्री र गतिविधिबाट सुरक्षित राख्न उपयुक्त सुरक्षा उपायहरू लागू गर्न असफल भए–नभएको’ बारे अनुसन्धान गरिरहेको जनाएको छ ।

यो बेलायतको अनलाइन सुरक्षा ऐन, २०२३ अन्तर्गत कुनै व्यक्तिगत सेवा प्रदायक विरुद्ध खोलिएको पहिलो अनुसन्धान हो, जुन वयस्क र बालबालिका इन्टरनेट प्रयोगकर्ताहरूको सुरक्षा गर्ने उद्देश्यले बनाइएको हो ।

ऐनअन्तर्गत सेवा प्रदायकहरूले गत महिनाको मध्यसम्म कुनै पनि अवैध सामग्रीबारे थाहा पाएपछि त्यसलाई हटाउनुपर्ने थियो ।अफकमले सामग्रीको ‘प्रकृति’ का कारण सेवा प्रदायक वा वेबसाइटको नाम उल्लेख नगरेको बताएको छ ।बिबिसीको प्रतिवेदनअनुसार फोरम संयुक्त राज्य अमेरिकामा होस्ट गरिएको छ र बालबालिकासहित दशौँ हजार सदस्यहरू छन् । यसले सम्भावित घातक विषाक्त रसायन कसरी किन्ने र प्रयोग गर्ने भन्ने बारे निर्देशनहरू साझा गर्ने सहित प्रयोगकर्ताहरूले आत्महत्याका विधिहरूबारे छलफल गर्ने बताएको छ ।

बेलायतमा करिब ५० जना आत्महत्या यस फोरमसँग जोडिएको बिबिसीले जनाएको छ । पालना गर्न असफल भएमा अफकमले अन्ततः सेवा प्रदायकलाई सामग्री हटाउन बाध्य पार्न अदालतको आदेश खोज्न सक्नेछ ।

यसले एक करोड ८० लाख पाउन्ड (दुई करोड ३० लाख डलर) सम्म वा यसको विश्वव्यापी राजस्वको १० प्रतिशत बराबरको रकम जरिवाना पनि गर्न सक्नेछ ।