संचारकर्मीलाई आर्थिक सहायता दिने वा प्रलोभनमा पार्ने काम गरिएको छैन : गोर्खा सत्याग्रह

लन्डन । ब्रिटिश गोर्खा सत्याग्रह संयुक्त संघर्ष समिति यूके-नेपालले अहिलेसम्म कुनै पनि संचारकर्मीलाई आर्थिक सहायता दिने वा प्रलोभनमा पार्ने काम नगरिएको प्रस्ट पारेको छ ।

संघर्ष समितिका प्रमुख संयोजक कृष्णबहादुर राईले बिहीबार विज्ञप्ति जारी गर्नुहुँदै आफै चन्दा संकलन गरेर जेनतेन चलिरहेको संगठनले पत्रकारलाई मासिक तलब खुवाएको भन्नु हास्यास्पद भएको दाबी गर्नुभएको हो । ‘समितिले अहिलेसम्म कुनै पनि संचारकर्मीलाई आर्थिक सहायता प्रदान गर्ने वा प्रलोभनमा पार्ने काम गरेको छैन । हामी आँफै चन्दा संकलन गरेर जेनतेन चलिरहेको संगठनले पत्रकारलाई मासिक तलब ख्वाएको भन्ने हास्यास्पद आरोप तल्लोस्तरको मनोगत सोच बाहेक केही होइन,’ विज्ञप्तिमा लेखिएको छ ।

गोर्खा सत्याग्रहले संस्थासँग जोडेर नेपाल पत्रकार महासंघ बेलायत शाखाका संस्थापक अध्यक्ष तथा पत्रकार नवीन पोखरेलको चरित्रहत्या गर्ने प्रयास भएकोमा भन्दै आपत्तिसमेत प्रकट गरेको छ ।