नेपालमा आँखा शिविर चलाउन बेलायतमा १७ जनवरीमा ‘फन्ड रेजिङ डिनर नाइट’

लन्डन । नेपालमा नि:शुल्क स्वास्थ्य शिविर सञ्चालनार्थ आर्थिक संकलन गर्न यही १७ जनवरीमा बेलायतमा ‘फन्ड रेजिङ डिनर नाइट’ हुँदै छ ।

तमु धीं यूकेका महासचिव तथा समाजसेवी डा विशाल गुरुङको अगुवाइमा ‘राम्रो आँखाको ज्योति, राम्रो जीवनका लागि’ नारासहित अल्डरसटस्थित एम्पायर हलमा डिनर नाइट हुन लागेको हो ।

कार्यक्रममा सहभागिताका लागि टिकटदर ४५ पाउन्ड तोकिएको छ । शिविरका लागि संघसंस्था र व्यक्तिहरूले सहयोग गर्न सक्नेछन् ।

यस पटक तमु धीं यूके आमा समूह, चार भन्ज्याङ तमु समाज यूके, पर्वत वेल्फेयर सोसाइटीलगायत संस्थाले सहयोग गर्ने प्रतिबद्धता नाइसकेको डा गुरुङले बताउनुभयो । कार्यक्रममा उपस्थित भएर परोपकारी काममा लागि सहयोग गरिदिन डा. विशालले संघसंस्था तथा व्यक्तिहरूलाई अनुरोध गर्नुभएको छ ।

उक्त अवसरमा खानासँगै राफल ड्र जस्ता मनोरञ्जनात्मक कार्यक्रम पनि हुनेछन् । डिनर नाइटका लागि तमु धीं यूकेले दुई वटा टेबल बुक गरिसकेको छ । अन्य संघसंस्थाले पनि टेबल बुक गरिरहेको उहाँले जानकारी दिनुभयो । डा विशालले यस वर्ष निःशुल्क आँखा शिविरको दोस्रो संस्करण आगामी फेब्रुअरीमा पर्वत र सर्लाहीमा सञ्चालन गर्ने जनाउनुभयो ।

नेपाल नेत्रज्योति संघसँगको समन्वयमा पर्वतको कुस्मा र चार भन्ज्याङमा १०,११, १२ र १३ फेब्रुअरी तथा सर्लाहीमा १८, १९ र २० फेब्रुअरीमा शिविर चल्नेछ । आँखा शिविरलाई सफल बनाउन आवश्यक तयारीका लागि कुस्मा नगरपालिकाका मेयरसहित अन्य व्यक्ति तथा संघसंस्थासँग कुरा भइरहेको डा.विशालले बताउनुभयो ।

शिविरका लागि कुस्मामा हिमालयन आँखा अस्पतालबाट र सर्लाहीका लागि भरतपुर आँखा अस्पतालबाट चिकित्सकको टोली खटिनेछ । सोसाइटी अफ नेप्लिज प्रोफेसनल्स यूकेका अध्यक्ष डा. ओमप्रसाद गौतम र नेपाल नेत्र ज्योति संघका अध्धक्ष डा. चेतराज पन्तले आँखा शिविरमा सुरुआतदेखि नै सहयोग गर्दै आएको डा. विशालले बताउनुभयो । डा. विशालले यसअघि सन् २०२३ फेब्रुअरीमा शिविरको पहिलो संस्करण सञ्चालन गर्नुभएको थियो ।

स्याङ्जाको पुतलीबजार नगरपालिकामा भएको शिविर सफल भएकाले नै दोस्रो संस्करण गर्न लागिएको उहाँको भनाइ छ । नगरपालिकालाई मोतीयाबिन्दु मुक्त क्षेत्र बनाउने अभियानअन्तर्गत भएको शिविरबाट ४ हजार ४७० जनाले सेवा लिएका थिए । ९४ जना बिरामीको मोतियाबिन्दुको शल्यक्रिया गरिएको थियो ।