एकपक्षीय सामग्री सम्प्रेषण नगर्न ‘नेपाल ब्रिटेन डटकम’ लाई काउन्सिलको पुन: निर्देशन

लन्डन । बेलायतबाट सञ्चालित अनलाइन ‘नेपाल ब्रिटेन डटकम’लाई असन्तुलित र एकपक्षीय सामग्री सम्प्रेषण नगर्न प्रेस काउन्सिल नेपालले पुन: निर्देशन दिएको छ ।

काउन्सिलको यसअघिको निर्देशन अवज्ञा गरेको भन्दै नेपाल पत्रकार महासंघ यूकेको प्रतिक्रियापछि नेपाल ब्रिटेनलाई फेरि सचेत गराइएको हो । ‘२०८१ कार्तिक २ गते खण्डन प्रकाशनपछि पनि ‘नेपाल पत्रकार महासङ्घ र त्यसका कार्यक्रमहरूप्रति भ्रम सिर्जना गरेको’ भनी प्रतिक्रिया पेस भएको सम्बन्धमा २०८१ मङ्सिर २७ गतेको बैठकबाट ‘आगामी दिनमा तथ्यगत पुष्ट्याईबेगर सन्तुलनरहित, एकपक्षीय सामग्री सम्प्रेषण नगर्न/नगराउन सचेत गराउने’ निर्णय भएकोले निर्णयानुसार सचेत गराइन्छ,’ पत्रमा उल्लेख छ ।

काउन्सिलका अनुगमन अधिकृत महेन्द्रराज सिंहले लेखेको सचेत पत्रमा नेपाल पत्रकार महासंघ यूके शाखालाई समेत बोधार्थ पठाइएको छ । पत्रकार महासंघ यूकेविरुद्ध भ्रामक समाचार सम्प्रेषण गरेपछि काउन्सिलले ‘नेपाल ब्रिटेन डटकम’लाई आचारसंहिता पालना गर्न र सम्प्रेषित समाचारको खण्डन सम्प्रेषण गरी जानकारी गराउन २०८१ असोज ९ मा पहिलोपटक निर्देशन दिएको थियो ।

आफू र पत्रकार महासंघ यूकेका विषयमा भ्रामक र कपोलकल्पित समाचार सामग्री सम्प्रेषण गर्ने कार्य नगरोकिएको भन्दै अध्यक्ष विमला सेनेले काउन्सिलमा कात्तिक २ मा पुनः उजुरी दिनुभएको थियो । नेपाल ब्रिटेन डटकम नेपालमा दर्ता गरेर देवराज आचार्य ‘चिरन शर्मा’ ले सञ्चालन गर्दै आउनुभएको छ ।