तमु धीं यूकेले मनायो रजत महोत्सव तथा सप्री ल्होछार

'तमु प्रतिभा पुरस्कार-२०२४' घोषणा

लन्डन । खचाखच सहभागीबीच तमु धीं यूकेले रजत महोत्सव तथा तमु ल्होछार मनाएको छ ।

शनिबार २८ डिसेम्बर २०२४ मा क्राइस्टचर्च एभिन्यू, ह्यारो लेजर सेन्टरमा अध्यक्ष हरि गुरुङको अध्यक्षता र नेपाली दूतावास लन्डनका उपनियोग प्रमुख विपिन दुवाडीको प्रमुख आतिथ्यतामा स्थापनाको २५औं वर्षगाँठ तथा ल्होछार मनाइएको हो । कार्यक्रममा यस वर्ष डा. हर्क गुरुङ अवार्ड जीसीएसी उत्कृष्ट अंक ल्याउने लमजुङ पुर्ख्यौली घर भई हाल बेलायतमा रहनुभएकी अम्बिका गुरुङलाई प्रमुख अतिथि दुवाडी र अध्यक्ष हरि गुरुङले खादा, प्रमाणपत्र र ५ सय पाउन्डको चेक हस्तान्तरण गर्नुभयो ।

यस्तै कार्यक्रममा संस्थाले हरेक ल्होछारमा प्रकाशन गर्ने ‘फ्रेंसी’ विमोचन, नवनिर्वाचित अध्यक्ष जुमकाजी गुरुङलाई अध्यक्ष हरि गुरुङ यस्तै आमा समूहकी नवनिर्वाचित अध्यक्ष कमला गुरुङलाई अध्यक्ष सन्ध्या गुरुङद्वारा कार्यभार हस्तान्तरण गरिएको थियो । कार्यक्रममा रजत महोत्सवको गीत सार्वजनिक गरिएको थियो भने तमु धीं यूकेका संस्थापक कार्यसमितिका अध्यक्ष तथा पदाधिकारीहरू र सल्लाहकारहरू, पूर्वअध्यक्षहरू, विभिन्न इकाइका वर्तमान तथा पूर्व अध्यक्षहरू, समुदायमा महत्त्वपूर्ण योगदान दिनेहरूलाई कम्युनिटी सर्भिस अवार्ड साथै प्रायोजकलगायतलाई सम्मान गरिएको थियो ।

कार्यक्रममा अन्तर्राष्ट्रियस्तरमा आफ्नो प्रतिभा देखाउने तमु समुदायका एक महिला र एक पुरुषलाई हरेक वर्ष प्रदान गरिने ‘तमु प्रतिभा पुरस्कार-२०२४’ घोषणा गरिएको छ । पहिलो वर्ष उक्त पुरस्कार राष्ट्रिय कराँते खेलाडी एरिका गुरुङ (धादिङ) र प्यारा ग्लाइडर युकेश गुरुङ (कास्की) लाई प्रदान गरिने महासचिव डा विशाल गुरुङले कार्यक्रममा जानकारी गराउनुभयो । पुरस्कारको राशफ जनही ५० हजार रुपैयाँ रहेको छ ।

कार्यक्रममा सम्बोधन गर्नुहुँदै प्रमुख अतिथि दुवाडीले तमु धीं यूकेले समुदाय र नेपाली समाजमा पुर्‍याएको योगदानको प्रशंसा गरेका थिए । त्यस्तै, विशेष अतिथि तमु धीं नेपालका अध्यक्ष हुम गुरुङले तमुहरूको मौलिकता हराउँदै गएकोमा चिन्ता व्यक्त गर्नुभएको थियो । गैरआवासीय नेपाली संघ उपाध्यक्ष हेमराज शर्माले राज्यले गर्नु पर्ने काम तमु धीं यूकेले गरिरहेको उल्लेख गर्नुभयो ।

कार्यक्रममा तमुधीं जापानका उपाध्यक्ष अर्मन गुरुङ, तमुँ ट्होह्यूला हङकङका भूपू उपाध्यक्ष गणेश गुरुङ, संस्थापक अध्यक्ष मिनप्रसाद गुरुङ, तमु प्हे ल्हु संघ यूकेका अध्यक्ष क्या. रि. डेमबहादुर योज तमु र तमु धीं यूकेका पूर्वउपाध्यक्ष एवं एनआरएनए यूकेका अध्यक्ष हितकाजी गुरुङलगायतले शुभकामना मन्तव्य राख्नुभएको थियो । ल्होछार कार्यक्रम संयोजक एवं उपाध्यक्ष कमल गुरुङले कार्यक्रमबारे प्रस्ट पार्नुभएको थियो ।

कार्यक्रममा बेलायतका विभिन्न स्थानीय निकायका मेयर, उपमेयर, काउन्सिलरहरू, धर्म गुरुहरू, विभिन्न संघसंस्थाका अध्यक्ष तथा प्रतिनिधिसहित बाक्लो संख्यामा उपस्थिति थियो ।
कार्यक्रममा नेपालबाट आएका कलाकारहरू राजबहादुर गुरुङ, आश्रम गुरुङ, सज्जा चौलागाईं र ब्यान्डसहित गायिका तृष्णा गुरुङले सांगीतिक प्रस्तुतिबाट मत्रमुग्ध पार्नुभएको थियो ।

औपचारिक कार्यक्रम महासचिव डा विशाल गुरुङले र सांगीतिक कार्यक्रम विभा गुरुङ, सूर्य गुरुङ, योगेश गुरुङ र हेलिसा गुरुङले सञ्चालन गर्नुभएको थियो ।