‘नेपाल म्याराथन च्यालेन्ज’ आयोजना गर्दै नेपाल रन यूके

लन्डन । नेपाल रन युकेले आउँदो १५ फेब्रुअरीदेखि २१ सम्म नेपालमा म्याराथन च्यालेन्ज गर्ने भएको छ । पहिलो पटक ७ प्रदेशमा ७ दिनमा ७ जना धावकहरू (यूके-अमेरिका) सम्मिलित ७ वटा म्याराथन र सँगै हाफ म्याराथनको तयारी गरिएको हो ।

आउँदो १५ फेब्रुअरीमा गण्डकी प्रदेशमा पोखरा म्याराथन, १६ फेब्रुअरीमा लुम्बिनीको बुटवलमा, १७ फेब्रुअरीमा सुदूरपश्चिमको धनगढीमा, १८ फेब्रुअरीमा कर्णालीको सुर्खेतमा, १९ फेब्रुअरीमा वाग्मतीको हेटौँडामा, २० फेब्रुअरीमा मधेस प्रदेशको जनकपुर र २१ फेब्रुअरीमा कोशीको धरानमा एकसाथ पूरा र हाफ म्याराथन गर्ने तयारी भएकोने पाल रन युकेका संस्थापक अध्यक्ष सन्तोष राईले जानकारी दिनुभएको छ । उहाँका अनुसार म्याराथनमा दौडन सात जना अन्तर्राष्ट्रियबाहेक १०/१० जना स्थानीय धावकहरू पनि संलग्न गराइने छ । यस अतिरिक्त २२ फेब्रुअरीमा ‘धरान टेन के रन’ समेत गर्न लागिएको छ ।

ती दौडमा राजन खत्री नेतृत्वको एथलेटिक्स परिवार नेपालले व्यवस्थापन तथा सहयोगी भूमिका निर्वाह गरेको छ । प्रत्येक प्रदेशमा स्थानीय संघसंस्थाले समेत सहयोग गर्नुभएको छ । अध्यक्ष राईले यो च्यारिटी इभेन्ट भएको जनाउँदै प्राप्त हुने सबै नाफा जुम्लामा निर्माणाधीन हाइ अल्टिच्युड ट्रेनिङ क्याम्पका लागि दिइने बताउनुभयो । उक्त क्याम्प बनाउन स्थानीय हरि रोकायाले जग्गा उपलब्ध गराइसक्नुभएको छ ।

बेलायतको नेपाली समुदायमा स्वास्थ्य सचेतना र नेपालका खेलाडीको आर्थिक सहयोगमा समर्पित नेपाल रन यूकेले लन्डनमा बर्सेनि नर्थल्ट टेन के रन गर्दै आएको छ ।