तमु धीं यूकेको अध्यक्षमा जुमकाजी गुरुङ निर्विरोध निर्वाचित

लन्डन । तमु धीं यूकेको अध्यक्षमा जुमकाजी गुरुङ निर्विरोध निर्वाचित हुनुभएको छ ।

शनिबार भएको मनोनयन दर्तामा अध्यक्षमा गुरुङको मात्रै उम्मेदवारी परेकाले उहाँ निर्विरोध हुनुभएको हो ।

जुमकाजी नेतृत्वको नयाँ कार्यसमितिको २९ जना नै निर्विरोध भएको निर्वाचन मण्डलका संयोजक एकेन्द्र गुरुङले जानकारी दिनुभयो ।

पदाधिकारी तथा सदस्यमा को को चयन भए भन्नेबारे यही डिसेम्बर १४ तारिखमा हुने २५औँ वार्षिक साधारणसभा र १३औँ अधिवेशनमा औपचारिक घोषणा गरिने संयोजक एकेन्द्रले बताउनुभयो ।

नयाँ अध्यक्ष चुनिएका जुमकाजी हरि गुरुङ नेतृत्वको १२ औं कार्यसमितिमा वरिष्ठ उपाध्यक्ष हुनुहुन्थ्यो । अत्यन्त मिहिनेती, सरल र सहयोगी स्वभावका जुमकाजी गुरुङको बेलायतका नेपाली समुदायमा छुट्टै पहिचान छ ।

सन् २००७ देखि सामाजिक संस्थामा जोडिएका गुरुङ १० औं कार्यसमितिको उपाध्यक्षमा निर्विरोध निर्वाचित हुनुभयो ।

तमुधिंको हेम्प्सायर सर्रे इकाई सदस्य, उपाध्यक्ष, अध्यक्ष र सन् २०१५–२०१६ को आठौं कार्यसमितिमा कोषाध्यक्षको भूमिका निभाउनुभएको थियो ।

विभिन्न सामाजिक कार्यमा सक्रिय गुरुङ बुबा स्व.सुनार गुरुङ र आमा मनसुवा गुरुङको कोखबाट पर्वतको ताङ्लेमा जन्मिनुभएको हो ।

२०३६ सालमा ब्रिटिस आर्मीमा भर्ती हुनुभएका उहाँले १८ वर्षे सेवापश्चात् अवकाश पाउनुभयो ।

अहिले परिवारसहित बेलायत बस्नुहुन्छ जुमकाजी । जुमकाजी तमुधिं यूकेका अलावा रामबजार सोसाईटी यूके, तमु संसार त्रैमासिक पत्रिका, लोकबहादुर स्मृति प्रतिष्ठान र तमु कल्चरल फोरमलगायत संघ संस्थामा आबद्ध हुनुहुन्छ ।