पूर्वगोर्खा हरिबुढामगर बेलायतमा प्रतिष्ठित पुरस्कारबाट सम्मानित

काठमाडौँ । कीर्तिमानी आरोही पूर्वगोर्खा हरिबुढामगर बेलायतमा प्रतिष्ठित पुरस्कारबाट सम्मानित हुनुभएको छ । घुँडाभन्दा माथिको दुबै खुट्टा गुमाएका व्यक्तिमा पहिलोपटक सगरमाथा आरोहण गर्नुभएका बुढामगर बेलायतको ‘एमबिई’ सम्मान पाउनुभएको हो । यो पुरस्कार बेलायतको तेस्रो प्रतिष्ठित सम्मान हो ।

बुढामगरलाई बेलायती राजाको तर्फबाट राजकुमारी एनले बुढामगरलाई पुरस्कार प्रदान गर्नुभएको हो । दीर्घकालीन रूपमा सकारात्मक प्रभाव पार्ने र अरूको लागि उदाहरणीय काम गरेर महत्वपूर्ण योगदान गर्ने व्यक्तिहरूका लागि एमबिई पुरस्कार प्रदान गरिन्छ ।

पुरस्कार ग्रहणपछि कीर्तिमानी आरोही बुढामगरले आफूलाई एमबिईबाट सम्मानित भएकोमा ‘एकदमै अद्भुत महसुस’ गरेको बताउनुभयो । बुढामगरले २०१० मा अफगानिस्तानमा ब्रिटिश सेना कार्यरत हुँदा विद्रोहीले थापेको आइडी (इम्प्रोभाइज्ड एक्सप्लोसिभ डिभाइस) विस्फोटमा दुबै खुट्टा गुमाउनुभएको थियो । उहाँले सन् २०२३ मा सगरमाथा आरोहरण गरेर कृतिमान कायम राख्नुभएको थियो । मगरलाई अपांगता सचेतना सेवाहरूको लागि एमबीई बनाइएको हो ।

बुढामगरले सन् २०१८ मा एभरेस्ट चढ्न अपाङ्गता भएका व्यक्तिहरूलाई प्रतिबन्ध लगाउने निर्णयलाई उल्टाउन नेपालको सर्वोच्च अदालतमा अभियान चलाउनुभएको थियो । पुरस्कार ग्रहणका क्रममा बुढामगरले राजकुमारी ऐनलाई सातवटा शिखर आरोहण पूरा गर्ने सुनाउनुभएको थियो ।

बुढामगरले सातवटा महादेशका सबैभन्दा अग्ला शिखर आरोहणको लक्ष्य राख्नुभएको छ । अहिलेसम्म ४ वटा शिखरको आरोहण गरिसक्नुभएको छ । आगामी फेब्रुअरीमा दक्षिण अमेरिकाको सबैभन्दा अग्लो पहाड एकोनकागुआ आरोणको तयारी गर्नुभएको छ ।