गुल्मी जिल्ला समाज यूकेको डिसेम्बर १ मा च्यारिटी कार्यक्रम, कलाकारमा दीपक, रेजिना र रुबिना

लन्डन । ३१ औं विश्व अपांगता दिवसको अवसरमा गुल्मी जिल्ला समाज यूकेले च्यारिटी कार्यक्रम गर्ने भएको छ ।

अपांगता भएकाहरूको सहयोगार्थ आउँदो १ डिसेम्बर २०२४ मा नर्थह्याम्पटनस्थित कम्युनिटी फुटबल ग्राउन्डमा च्यारिटी कार्यक्रम राखिएको अध्यक्ष रुद्र थापामगरले जानकारी दिनुभएको हो । गुल्मी जिल्ला समाज यूकेले विगत १३ वर्षदेखि नेपालमा भएका अपांगहरूको सहयोगार्थ विश्व अपाङ्गता दिवसको अवसरमा प्रत्येक वर्ष च्यारिटी कार्यक्रम गर्दै आएको छ ।

बिहान ११ देखि राति ८ बजेसम्म हुने कार्यक्रममा प्रथम गुल्मेली बाजासहित नेपालबाट आएका ख्यातिप्राप्त राष्ट्रिय कालाकारहरुको पनि बेजोड प्रस्तुति रहने अध्यक्ष थापामगरले बताउनुभयो । कलाकारहरुमा दीपक घर्ती मगर, रेजिना परियार, रुबिना अधिकारीलगायत हुनुहुन्छ ।

अध्यक्ष थापामगर परोपकारी अभियानलाई सफल बनाउन गुल्मी जिल्ला समाज यूकेलाई माया गर्ने सम्पूर्ण गुल्मेली तथा गैरगुल्मेली दाजुभाइ, दिदीबहिनीहरूमा उक्त दिनको कार्यक्रममा सहभागी भई दिन अनुरोधसमेत गर्नुभएको छ । अध्यक्ष थापामगरले विश्व अपांगता दिवस विशेष रुपमा मनाउन लागिएको भन्दै उक्त कार्यक्रममा उपस्थित भएर वा नभ्याएमा सकेको सहयोग गरिदिन आग्रह गर्नुभएको छ ।

यो कार्यक्रम अपांगता सचेतनामात्रै नभएर कार्यक्रमबाट उठेको रकम नेपालमा रहेका असक्त (अपांग) व्यक्तिहरुलाई नगद नभई जीवनमा लामो काम लाग्ने सीप र ज्ञान सिकाएर आत्मनिर्भर हुने क्षेत्रमा खर्च गराउने योजना रहेको अध्यक्ष थापामगरले सुनाउनुभएको छ । कार्यक्रममा खानाको व्यवस्थासहित २५ पाउन्ड प्रवेश शुल्क तोकिएको अध्यक्ष थापामगरले बताउनुभयो ।