आठ दिनदेखि बेलायतमा बेपत्ता नेपाली विद्यार्थी फेला

लन्डन । गएको आठ दिनदेखि बेलायतमा हराइरहेका नेपाली विद्यार्थी सचिन भट्टराई सकुशल भेटिनुभएका छ ।

बिस्टलमा उहाँसँगै बस्ने साथी स्पन्दन वाग्लेले आइतबार बेलुका सचिन आफ्नो डेरामा फर्किएको जानकारी दिनुभयो । यसअघि उहाँले ब्रिस्टल प्रहरीमा गएर बयान दिनुभएको थियो । उहाँ कसरी हराए र कसरी भेटिए भन्नेबारे प्रहरीले केही बताएको छैन ।

उच्च शिक्षाका लागि करिब दुई महिनाअघिमात्र बेलायत आएका सचिन भट्टराईको खोजीमा सहयोग गरिदिन उहाँको परिवारले आग्रह गरेको थियो ।

युनिभर्सिटी अफ वेष्ट इंग्ल्यान्डमा एमबीए अध्ययनरत मोरङ सुन्दरहरैचा–७ गोठगाउँ घर भएका २४ वर्षीय भट्टराई गत १६ नोभेम्बर शनिबार बेलुकीदेखि सम्पर्कविहीन हुनुभएको थियो ।

सचिनले स्थानीय डोमिनोज पिज्जामा काम गर्दै आउनुभएको थियो । १६ नोभेम्बर राती डेरामा नफर्केपछि उहाँसँगै बस्ने साथी स्पन्दन वाग्लेले आइतबार उहाँको परिवार र सोमबार प्रहरीलाई खबर गर्नुभएको थियो ।

गत सेप्टेम्बर २१ मा मात्रै लन्डन आउनुभएका सचिन दुई महिना हुन नपाउँदै बेपत्ता हुँदा परिवार चिन्तित थियो ।

सचिनका पिता शशीकान्त भट्टराईले आफ्नो छोराको खोजी गर्न सहयोग गर्ने र चासो देखाउने ब्रिटिश प्रहरी, नेपाली दूतावास लगायत बेलायतस्थित नेपाली समुदायलाई हार्दिक धन्यवाद दिनुभएको छ ।

लन्डनस्थित नेपाली दूतावास, एनआरएनए युके लगायतले उहाँको खोजीका लागि ब्रिस्टल प्रहरीसँग समन्वय गर्नुका साथै नेपाली समुदायलाई आग्रह गरेका थिए ।