बेलायतद्वारा जलवायु परिवर्तनका असर घटाउन गरेका प्रतिबद्धताअनुसार सहयोग हुन्छ : विशेष प्रतिनिधि क्याथे

बाकु । संयुक्त अधिराज्य (बेलायत)का जलवायु परिवर्तनसम्बन्धी विशेष प्रतिनिधि रिचेल क्याथे नेपालसँग बेलायतको ऐतिहासिक सम्बन्धबारे चर्चा गर्दै बेलायतले जलवायु परिवर्तनका असर न्यूनिकरणका लागि गरेको प्रतिबद्धताअनुसार सहयोग गर्ने बताउनुभएको छ ।

अजरबैजानका बाकुरमा जारी जलवायु परिवर्तनसम्बन्धी अन्तर्राष्ट्रिय सम्मेलनस्थलमा शनिबार नेपालका वन तथा वातावरणमन्त्री ऐनबहादुर शाहीसँगको भेटमा उहाँले उक्त धारणा राख्नुभएको हो । दुई नेताबीचको भेटवार्तामा द्विपक्षीय आपसी हित र सहयोगका विविध पक्षमा कुरा भएको भेटमा सहभागी वन मन्त्रालयका उपसचिव दीपा ओलीले जानकारी दिनुभयो ।

भेटमा मन्त्री शाहीले बेलायतसँग नेपालको दीर्घकालीन, सौहार्दपूर्ण र ऐतिहासिक सम्बन्ध रहदै आएको उल्लेख गर्दै बेलायत सरकारको सहयोगमा नेपालमा जलवायु परिवर्तनका क्षेत्रका विभिन्न परियोजनाहरू र कार्यक्रमहरू सञ्चालन हुँदै आएको बताएको उपसचिव ओलीले बताउनुभयो । साथै उहाँले हालै मात्र भएको नेपाल र बेलायतबीच भएको रेन परियोजनाको सम्झौताले वर्तमान सफलतालाई थप अगाडि बढाउने र नेपालको जलवायु तथा विपद् व्यवस्थापन कार्यलाई थप विस्तार गर्न मद्दत गर्ने उल्लेख गर्नुभएको थियो ।

मन्त्री शाहीले संयुक्त अधिराज्यको ग्लास्गोमा सम्पन्न कोप–२९ मा नेपाल सरकारले आफ्नो जलवायु महत्वाकांक्षी महत्त्वपूर्ण घोषणाहरू गरेको बारेमा स्मरण गराउँदै आगामी दिनमा थप सहयोगको अपेक्षा गर्नुभएको थियो ।