अमेरिकाको राष्ट्रपतिमा डोनाल्ड ट्रम्प निर्वाचित

लन्डन । अमेरिकाको राष्ट्रपतिमा रिपब्लिकन उम्मेदवार डोनाल्ड ट्रम्प निर्वाचित हुनुभएको छ ।

डेमोक्रेटिककी उम्मेवार कमला ह्यारिसलाई पराजित गर्दै ट्रम्प दोस्रो कार्यकालका लागि राष्ट्रपतिमा मंगलबार निर्वाचित हुनुभएको हो । समाचार एजेन्सी एपीका अनुसार अधिकांश राज्यको मतगणना सकिएको छ । त्यहीकारण रिपब्लिकनका प्रत्यासी ट्रम्पलाई विजेता घोषित गरिएको हो ।

अमेरिकी राष्ट्रपति चुनावमा डोनाल्ड ट्रम्पले बहुमत हासिल गर्ने क्रममा २ सय ७९ इलेक्टोरल कलेज भोट मिलेको छ । ह्यारिसले २ सय १९ मात्रै इलेक्टोरल कलेज भोट लिन सफल हुनुभयो । उहाँ जो बाइडेन नेतृत्वको प्रशासनमा उपराष्ट्रपति हुनुहुन्थ्यो ।

ट्रम्पले अमेरिकाका सातमध्ये चार स्विङ स्टेट्समा जित निकाल्नुभएको छ । यिनमा जर्जिया, नर्थ क्यारोलाइना, भिस्कान्सिन र पेन्सिलभेनिया रहेका छन् ।

अमेरिकामा कूल ५ सय ३८ इलेक्टोरल कलेज भोट छन् । सिनेटमा १०० र हाउस अफ रिप्रिजेन्टेटिभका ४ सय ३८ मध्ये बहुमतका लागि २ सय ७० मत आवश्यक हुन्छ ।

तीन स्विङ स्टेट नेभाडा, मिशिगन र एरिजोनाको मतपरिणाम भने कमला ह्यारिसको पक्षमा गएको छ । ट्रम्पले आगामी २० जनवरी २०२५ देखि पदभार सम्हाल्नुहुनेछ ।

यसैबीच, नेपालका राष्ट्रपति रामचन्द्र पौडेलले अमेरिकाका नवनिर्वाचित राष्ट्रपति डोनाल्ड ट्रम्पलाई बधाई दिनुभएको छ । मंगलबार भएको राष्ट्रपतीय चुनावमा रिपब्लिकन पार्टीका उम्मेदवार ट्रम्प दोस्रो कार्यकालका लागि विजयी हुनुभएलगत्तै सामाजिक सन्जाल एक्समार्फत राष्ट्रपति पौडेलले बधाई तथा शुभकामना दिनुभएको हो ।

राष्ट्रपति पौडेलले ट्रम्पको कार्यकालमा नेपाल-अमेरिका सम्बन्ध थप सुदृढ हुने विश्वाससमेत व्यक्त गर्नुभएको छ । ‘अमेरिकाको राष्ट्रपतिको रूपमा दोस्रो कार्यकालका लागि तपाईंलाई सफलताको शुभकामना । तपाईंको कार्यकालमा नेपाल–अमेरिका सम्बन्ध थप सुदृढ हुनेमा म विश्वस्त छु,’ उहाँले एक्समा लेख्नुभएको छ ।