बेलायतमा पनि बढ्यो तिहारको रौनक, गोर्खा आमा समूह एम्पायर हलको टिमले खेल्यो देउसी

अल्डरसट । हिन्दु धर्मावलम्बीको दोस्रो ठूलो चाड तिहारको रौनक बेलायतमा पनि बढेको छ ।

यूकेका विभिन्न सहरमा बसोबास नेपालीहरूले तिहारको तयारी, देउसीभैलो खेल्ने, लक्ष्मी पूजा गर्नेलगायत गरिरहेका छन् । 

बिहीबार  गोर्खा आमा समूह एम्पायर हलको टिमले पनि देउसी खेलेको छ ।  

टोलीले ओम्रु क्लोथिङमा देउसीको नृत्यसहित रमझम गरेको थियो । आमाहरू मादलमा ताल मिलाउँदै नाच्नुभयो ।

आपसमा दीपावलीको शुभकामना साटासाट गरेर रमाइलो गरेका थिए ।

तिहारको मुख्य दिन आइतबार ३ नोभेम्बर २०२४ मा नेपाल, बेलायतसहित विश्वभर पुगेका नेपालीले भाइटीबा लगाएर मनाउँदै छन् ।

तस्बिर : मिलन तमु

यमपञ्चक समेत भनिने तिहारको पाँचौं दिन भाइटीका पर्व दिदी बहिनीले आफ्ना दाजुभाइलाई श्रद्धा, आस्था र निष्ठाका साथ दीर्घायु, आरोग्य र ऐश्वर्य प्राप्तिको कामना गर्दै परम्परा अनुसार पञ्चरङ्गी वा सप्तरङ्गी टीका लगाएर मनाइन्छ ।

प्रत्येक वर्ष कार्तिक शुक्ल द्वितीयाका दिन मनाइने नेपालीको दोस्रो ठूलो चाड तिहारको मुख्य दिन दाजुभाइले दिदीबहिनीबाट टीका ग्रहण गर्दछन् ।

दिदीबहिनीले दाजुभाईलाई टीका लगाएपछि दाजुभाइले पनि दिदीबहिनीलाई टीका लगाउने गरिन्छ ।

दिदीबहिनीलाई पूजा गर्नाले अखण्ड सौभाग्य र ऐश्वर्य प्राप्त हुने शास्त्रीय मान्यता रहेको धर्मशास्त्रविद् एवं नेपाल पञ्चाङ्ग निर्णायक विकास समितिका सदस्य प्रा डा देवमणि भट्टराईले जानकारी दिनुभयो ।

दिदी बहिनीले दाजुभाइलाई तेलको धाराले छेकेर परम्परा अनुसार सप्तरङ्गी वा पञ्चरङ्गी टीका, मखमली, सयपत्री वा गोदावरी लगायतका फूलका माला लगाइदिने गरिन्छ । तिहारमा सप्तरङ्गी टीका लगाउने भनी प्रचारप्रसार गरिए पनि शास्त्रीय मान्यता भने तिहारमा लगाउने टीकाको रङ्ग रातो, सेतो, पहेँलो, हरियो र नीलो गरी पाँचवटा उल्लेख गरिएको छ । टीका लगाइदिएपछि दिदीबहिनीले दाजुभाइलाई ओखर, कटुस, मर मसला एवं सेलरोटी लगायतका खानेकुरा दिने र दाजुभाइले पनि दिदीबहिनीलाई गच्छे अनुसार सौभाग्यका प्रतीक कपडा र दक्षिणा दिई सम्मान प्रकट गर्ने धार्मिक एवं सामाजिक परम्परा छ ।