भीषण बाढीको चपेटामा दक्षिणपूर्वी स्पेन, मृतकको संख्या २०० नाघ्यो, कयौं बेपत्ता

लन्डन । असिनासहितको मुसलधारे वर्षाका कारण दक्षिणपूर्वी स्पेनमा आएको बाढीमा परी मृत्यु हुनेको संख्या २ सय नाघेको छ । कैयौं बेपत्ता भएका छन् ।

मंगलबारको भीषण वर्षापछिको बाढीबाट ज्यान गुमाउनेको संख्या अझै बढी हुन सक्ने स्थानीय अधिकारीले बताएको अन्तर्राष्ट्रिय सञ्चारमाध्यमले जनाएका छन् । गत मंगलबार भ्यालेन्सिया नजिकैको चिभा सहरमा वर्षभरिमा पर्ने पानी आठ घण्टामै परेको थियो । बाढीबाट सडक, रेल मार्ग र पुल भत्किएका छन् । कैयौं फराकिला क्षेत्र जलाम्य भएका छन् । सडकहरूमा बाढीले बगाएर ल्याएका सवारीसाधनको थुप्रो छन् ।

केही भिडियोमा बगिरहेका मानिसलाई रूखले जोगाएको देखिन्छ । भारी वर्षा र असिनाले देशका अधिकांश भूभाग प्रभावित भएको छ । उडानका साथै यातायात सेवा अवरुद्ध छ । स्थानीय सञ्चारमाध्यमले बेलेरिक टापुमा पनि व्यापक क्षति र मानिस हताहत भएको उल्लेख गरेका छन् ।