लण्डन । किरात राई यायोख्या बेलायतले यसवर्षको साकेला उभौली वोकिङस्थित ग्याम्बल्स लेनमा रहेको आफ्नै जग्गामा मनाएको छ ।
अध्यक्ष चन्द्रबहादुर राईको अध्यक्षतामा भएको सो समारोहमा प्रमुख अतिथि गिल्फोर्डका मेयर साली बार्कर एमबीई हुनुहुन्थ्यो ।
कार्यक्रमको शुरुमा नाक्छुङ किताबशेर राई र पुर्खा रत्न राईले पूजाथानमा विधिवत पूजा गरेका थिए । त्यसपछि मञ्चमा औपचारिक कार्यक्रम अघि बढेको थियो । औपचारिक कार्यक्रमको सञ्चालन महासचिव चन्द्रावती राई र उपमहासचिव प्रमिला लाबुङ राईले गरेका थिए ।
कार्यक्रममा उपाध्यक्ष मेजर रिटायर्ड दिलकुमार राईले स्वास्थ्य र सुरक्षाका बारेमा जानकारी गराएका थिए भने स्वागत मन्तब्य उपाध्यक्ष क्याप्टेन रिटायर्ड सुमनचन्द्र राईले गरेका थिए ।
कार्यक्रमका प्रमुख अतिथि, अतिथिहरुले संयुक्त रुपमा दीप प्रज्वलन गरी कार्यक्रम उद्घाटन गरेका थिए । कार्यक्रममा प्रमुख अतिथि मेयर साली बार्कर र गैरआवासीय नेपाली संघ युकेका अध्यक्ष प्रेम गाहामगरले शुभकामना व्यक्त गरेका थिए ।
कार्यक्रममा भाषागत संस्था र स्थानीय शाखाहरुले सिली प्रदर्शन गरेपछि कार्यक्रममा उपस्थित सबैले सिलीमा भाग लिँदा कार्यक्रम रमाइलो भएको थियो ।
कार्यक्रममा रसमोर र फोल्कस्टोनका मेयरहरु लगायत बेलायतस्थित नेपाली समुदायका अग्रजहरुको उपस्थिति रहेको थियो ।
तस्वीरहरू शिव भण्डारी
