गोरखाहरूको समस्या समाधानको मौका नगुमाउन गेसोको परराष्ट्र मन्त्रीलाई अनुरोध

काठमाडौँ । गोर्खा भूतपूर्व सैनिक संघ (गेसो) विगत २०८ वर्षदेखि थाँती रहेको गोरखा सैनिकहरूमाथिको चरम असमानता, भेदभाव र अमानवीय व्यवहार सदाका लागि अन्त्य गर्ने अन्तिम मौका नगुमाउन नेपाल सरकारलाई अनुरोध गरेको छ ।
नवनियुक्त उपप्रधान तथा परराष्ट्रमन्त्री नारायणकाजी श्रेष्ठसँग गोरखा भूतपूर्व सैनिकका समस्या तत्काल समाधानका निमित्त आज गेसो सभापति कृष्णकुमार राईको नेतृत्वमा गएको टोलीले सो अनुरोध गरेको हो ।
सो टोलीमा पूर्वमन्त्री तथा सांसद सुदन किराती, गेसो उपसभापति जीतबहादुर राई, उपमहासचिवद्वय बुद्धिराज राई, मान बहादुर गुरुङ तथा नेकपा माओवादी (केन्द्र) का युवानेता वसन्त राई संलग्न हुनुहुन्थ्यो ।
प्रतिनिधिमण्डलले गोरखा सैनिकहरुको समस्या समाधानार्थ विभिन्न चरणमा भएका प्राविधिक समिति र दुवै सरकारवीच भएका बैठक र वार्ताहरुले कुनै ठोस निष्कर्ष लिन नसकिरहेको बारे जानकारी गराएको थियो । साथै यही मार्च २७ दिन लण्डनमा हुने मन्त्रीस्तरीय वार्तालार्ई सफल बनाउन वार्ता अगावै नेपाल सरकारको प्रतिनिधि र गोरखाजन्य संस्थाहरुबीच बृहत छलफल र बहस गरी अजेण्डा तयार पार्न परराष्ट्र मन्त्रीको ध्यानाकर्षण गराइएको सभापति कृष्णकुमार राईले बताए ।
सो भेटमा पराष्ट्र मन्त्री श्रेष्ठले गोरखाहरुको समस्या भनेको गोरखाहरुको मात्र नभई यो राष्ट्रकै समस्या भएको हुनाले समधानको लागि आफू पदमा रहँदा र नरहँदा गम्भीर रहने गरेको र अहिले सम्बन्धित मन्त्रालयको मन्त्रीको हैसियतले समस्या सदाको लागि हल गर्न गम्भीर भएर लागिरहेको बताए । नेपाल सरकारले पनि यस बारे सम्बन्धित सरकारसँग कुरा गरिरहेको र आफ्नो तर्पmबाट गोरखाहरुको समस्या समधान गर्न कुनै कसर बाँकी नराख्ने प्रतिवद्धता पनि उनले व्यक्त गरे ।
यहीक्रममा गेसोले नवनियुक्त संस्कृति, पर्यटन तथा नागरिक उड्डयनमन्त्री हितबहादुर तामाङलाई पनि भेटी संस्थाको तर्फ़बाट सफल कार्यकालको शुभकामना तथा बधाई दिँदै गोरखा सैनिकहरुको समस्या समाधानार्थ भैरहेको वार्ता बारे पनि जानकारी गराएको छ ।