फेब्रुअरी २१ को वार्तामा गोरखाका तर्फबाट तीनजनाले भाग लिने

लण्डन । गोरखा भूतपूर्व सैनिकहरुको समस्याका बारेमा नेपाल तथा बेलायत सरकारबीच भइरहेको वार्ताको यही फेब्रुअरी २१ मा हुने वार्तामा गोरखा भूतपूर्व सैनिकका तर्फबाट तीन जनाले भाग लिने भएका छन् ।
आज लण्डनस्थित नेपाली राजदुताबासमा राजदुतसहित बसेको गोरखा भूतपूर्व सैनिकजन्य संस्थाहरुको (जी १०) बैठकले वार्तामा भाग लिने प्रतिनिधिहरुको नाम छानेको हो ।
जसमा गोरखाहरुका बारमा वार्ताको शुरुवातदेखि नै सहभागी हुँदै आएका मेजर रिटायर्ड जुदबहादुर गुरुङका साथै मेजर रिटायर्ड उदयबहादुर गुरुङ र सत्याग्रही पुष्पा राणा घलेले यसपटक भाग लिने गोरखा भूतपूर्व सैनिक संघ (गेसो) का उपसभापति धर्मबहादुर तामाङले जानकारी दिए ।
यसअघि वार्तामा मेजर गुरुङ, धर्मबहादुर तामाङ र गोरखा सत्याग्रह संयुक्त संघर्ष समितिका संयोजक कृष्णबहादुर राईले भाग लिने गरेका थिए ।
बैठकमा राईले यसपटकको वार्तामा आफू सहभागी नहुने आफ्नो सट्टामा मेजर उदयबहादुर गुरुङलाई पठाउन सिफारिस गरेका थिए भने अर्का वार्ताकार तामाङले यसपटकको वार्तामा पुष्पा राणा घलेलाई पठाउन सिफारिस गरेका थिए ।
अघिल्लोपटक नोभेम्बरमा भएको वार्ता पेन्सनको अजेण्डामा पुग्दा वार्ताका लागि तय भएको समय सकिएको थियो । वार्ताकार तामाङले यसपटकको वार्तामा अध्यागमनका अधिकारीहरु आउने निश्चित भइसकेको र उनीहरुले यसअघिको वार्तामा गोरखाहरुले अध्यागनका बारेमा उठाएका सवालहरुको जवाफ दिने पनि तामाङले जानकारी दिए । अघिल्लो वार्तामा गोरखाहरुले पूर्व गोरखाहरुका सन्तानलाई बेलायतमा बिनाशर्त आउन दिइनुपर्ने जिकिर गरेका थिए ।
फेब्रुअरी २१ को वार्तामा पेन्सनका बारेमा छलफल हुने नहुने निश्चित भइसकेको छैन ।