पाकिस्तानमा निर्वाचनको अन्तिम परिणाम इमरान खानको पक्षमा

इस्लामावाद । पाकिस्तानको निर्वाचन आयोगले प्रकाशित गरेको आम निर्वाचनको पूर्ण परिणाम आइतबार सार्वजनिक गरेको छ ।
पाकिस्तानको नेशनल एसेम्ब्ली (राष्ट्रिय सभा) का लागि घोषित निर्वाचन परिणामअनुसार इमरान खानको समर्थन रहेका स्वतन्त्र उम्मेदवारले १०१, पूर्वप्रधानमन्त्री नवाज सरिफको पाकिस्तान मुस्लिम लिग–नवाजले ७५ र पूर्व विदेशमन्त्री बिलावल भुट्टो जरदारीले ५४ सिट प्राप्त गरेका छन् ।
उता अलजजिराले सार्वजनिक गरेको मतपरिणाममा भने स्वतन्त्र उम्मेदवारले ९७, नवाज सरिफको पार्टीले ७६ र भुट्टोको पार्टीले ५४ सीटमा विजय प्राप्त गरेको बताइएको छ ।
प्रर्व प्रधानमन्त्री खानको पार्टी पीटीआईलाई चुनाव चिन्ह नदिइएपछि उनका समर्थकहरु स्वतन्त्र रुपमा चुनावमा भाग लिएका थिए ।
२६६ सीटका लागि हुनुपर्ने निर्वाचनमा एक सीट भने उम्मेदवारको निधन भएका कारण निर्वाचन रोकिएको छ । बाँकी २६५ सीटको मतपरिणाम आइसकेको छ ।
अब सरकार बनाउन चाहने दलका लागि १३४ सीटको आवश्यकता पर्नेछ ।