असुरक्षाका कारण बेलायती मन्त्रीले त्यागे राजनीति

लण्डन । शारीरिक असुरक्षाका कारण बेलायतका न्याय मन्त्री मार्क फ्रिअले राजनीति त्याग गर्ने भएका छन् ।
लण्डनको फिन्चले र गोल्डज ग्रीन निर्वाचन क्षेत्रबाट निर्वाचित उनले लगातारको ज्यान लिने धम्की, दुब्र्यबहार र ज्यान लिने कोसिसपछि राजनीति छाड्ने निर्णय गरेको बताएका छन् ।
गत क्रिस्मसमा मात्र उनको निर्वाचन क्षेत्रमा रहेको कार्यालयमा आगलागी भएको थियो ।
यसअघि सांसद डेभिड अमिसको हत्यामा संलग्न व्यक्ति पटकपटक उनको कार्यालयमा आक्रमणको उद्देश्यसहित पुगेका थिए । तर त्यसबेला उनी वेष्टमिन्स्टरमा भएकाले जोगिएका थिए ।
यहुदीहरुको बाक्लो बसोबास रहेको सो निर्वाचन क्षेत्रबाट निर्वाचित उनले इजरायलको पक्षमा लबिङ गर्ने गरेका छन् ।
उनले सार्वजनिक कार्यक्रममा जाँदा पनि आक्रमण भइहाल्यो भने कता भाग्ने ढोका छ कि छैन हेर्ने र चक्कु प्रहारबाट बच्न ‘एण्टी स्ट्याब भेष्ट’ लगाउने गरेको पनि बताएका छन् ।
बेलायतजस्तो कानुनको शासन भएको मुलुकमा वर्तमान सरकारका मन्त्री नै सुरक्षाका कारण देखाउँदै राजनीतिबाट अलग हुनु अनौठो घटना हो ।