युवराज्ञी घर फर्किन, राजा अझै अस्पतालमै

लण्डन । स्वास्थ्योपचारका लागि एउटै अस्पतालमा भर्ना भएका बेलायतका राजा चाल्र्स र युवराज्ञी केटमध्ये केट आज घर फर्केकी छिन् ।
पेटको शल्यक्रियापश्चात दुई साता लामो अस्पताल बसाइपछि उनी आज विन्जर क्यालस्थित निवास फर्किएको केन्जिङटन पालेसले आज जानकारी दिएको छ ।
४२ वर्षीया युवराज्ञी जनवरी १६ मा लण्डनस्थित द लण्डन क्लिनिकमा भर्ना भएकी थिइन् ।
डिस्चार्ज भएपछि उनले अस्पतालको समस्त टीमलाई धन्यवाद दिएकी छिन् ।
उनी इस्टरसम्म सार्वजनिक कार्यक्रममा नआउने अनुमान गरिएको छ ।
उता सोही अस्पतालमा उपचाररत ७५ वर्षीय राजा चाल्र्स पछि छिट्टै डिस्चार्ज हुने आशा गरिएको छ । उनलाई प्रोस्टेटको शल्यक्रियाका लागि अस्पताल भर्ना गरिएको हो ।