बेलायतमा यशकुमारको साँगीतिक साँझ हुँदै

लण्डन । गायक यशकुमार आफ्नो साँगीतिक प्रस्तुति लिएर पहिलोपटक बेलायत आउन लागेका छन् ।

करिब तीन दशकदेखि गीत संगीतको माध्यमबाट आफ्ना सिर्जनाहरू ल्याइरहेका यशकुमारको पछिल्लो समयमा काठमाडौँ महानगरमा मकै पोल्ने युवती पात्र रहेको गीत र हालसालैकै पूर्वी नेपालको सेरोफेरोमा छायाँकन गरिएको गीत चर्चामा छ ।

आफैँ अभिनय गर्ने, चलचित्र बनाउने र निर्देशन समेत गर्ने बहुप्रतिभाशाली कलाकार यशकुमारको साँगीतिक कार्यक्रम बेलायतमा नेपालीहरूको अति सघन बसोबास रहेको अल्डरसटस्थित एम्पायर हलमा फेब्रुअरी २ मा र आसफोर्ड केन्टस्थित सिंगलटन भिलेज हलमा फेब्रुअरी ३ मा हुँदैछ ।

अल्डरसटमा यशकुमारलाई शब्द ब्याण्डले साथ दिनेछ भने आसफोर्डमा स्थानीय गायक बिसी राईले।

कार्यक्रमको टिकट दर पनि अति नै सस्तो राखिएको छ । अग्रीम बुकिङका लागि १० पाउण्ड र कार्यक्रम स्थलमा १५ पाउण्ड मात्र ।