बेलायतमा आजदेखि एनआईमा २ प्रतिशत कटौती

लण्डन । बेलायतमा आजदेखि न्याशनल इन्स्योरेन्स (एनआई) दुई प्रतिशतले कटौती गरिएको छ ।
यसअघि वार्षिक तलव १२ हजार ५७१ पाउण्डदेखि ५० हजार २७० पाउण्डसम्म पाउनेहरुले १२ प्रतिशत एनआई तिर्नुपर्नेमा आजदेखि १० पाउण्डमा झारिएको छ । सरकारले नयाँ व्यवस्थाबाट करिब २ करोड ७० लाख जागिरेहरुलाई फाइदा पुग्ने अनुमान गरेको छ ।

बेलायती अर्थमन्त्री जेरेमी हन्टले यसअघि शरदकालिन बजेट भाषणमा सो कुरा घोषणा गरेका थिए ।
बेलायतको स्वतन्त्र परामर्शदाता संस्था फिस्कल स्टडिजका अनुसार सरकारले लागू गरेको नयाँ प्रावधानबाट वार्षिक ३० हजार पाउण्ड तलव पाउनेहरुले करिब ३५० पाउण्ड वचत गर्ने बताएको छ । उता अर्थ मन्त्री जेरेमी हन्टले नयाँ प्रावधानबाट एउटा घरमा करिब वार्षिक १ हजार पाउण्ड लाभ हुने बताएका छन् ।
यसैगरी स्वरोजगारहरुका लागि भने यसै वर्षको अप्रिल ६ तारिखदेखि नयाँ एनआई लागू हुने भएको छ । अहिले वार्षिक १२ हजार ५७१ पाउण्डदेखि ५० हजार २७० पाउण्डसम्म कमाइरहेका स्वरोजगारहरुले ९ प्रतिशत एनआई तिरिरहेकोमा त्यसपछि भने ८ प्रतिशत मात्र तिर्नुपर्ने छ ।
बेलायतमा वार्षिक १२ हजार ५७० पाउण्डभन्दा माथि आम्दानी गर्नेहरुले एनआई तिर्नुपर्ने व्यवस्था छ । सो एनआई स्टेट पेन्सन, बेरोजगार भत्ता, सुत्केरी भत्ता, स्वास्थ्य सेवा लगायतमा खर्च गरिन्छ । एनआई रोजगारदाता र जागिरे दुवैले तिर्नुपर्दछ ।