तमुलाई पुरस्कार, सेनेलाई सम्मान

लण्डन । नेपाल आदिवासी जनजाति पत्रकार महासंघ (फोनिज) युकले यसवर्षको फोनिज युके पत्रकारिता पुरस्कार फोटो पत्रकार तथा गोरखा मिडियाका प्रबन्धक मिलन तमु गुरुङ र सम्मान गोरखा च्यानलकी विमला सेनेलाई प्रदान गरेको छ ।

फोनिज युकेको चौथो अधिवेसनका अवसरमा शनिबार अल्डरसटमा आयोजित एक कार्यक्रममा तमु र सेनेलाई प्रमुख अतिथि नेपाल आदिवासी जनजाति महासंघ युकेका अध्यक्ष कर्मा पहाडी शेर्पा र फोनिज युकेका अध्यक्ष गोमा रानाले पुरस्कार तथा सम्मान पत्र हस्तान्तरण गरेका थिए ।

पुरस्कारको राशी १०१ पाउण्ड र कदर पत्र रहेको छ ।

सो पुरस्कार पाएपछि छोटो मन्तब्यका क्रममा पत्रकार तमुले पुरस्कारले अझ पत्रकारितामा लाग्न हौसला मिलेको बताए । यस्तै सम्मान पाएपछि मन्तब्य दिने क्रममा पत्रकार सेनेले सम्मानका लागि फोनिज युकेप्रति आभार व्यक्त गरिन् ।

पत्रकार तमु बेलायतमा लामो समयदेखि फोटो पत्रकारितामा आवद्ध छन् । एभरेष्ट टाइम्समा लामो समय संलग्न उनी हाल गोरखा मिडिया सन्चालन गर्दै आएका छन् । उता पत्रकार सेने लामो समय रेडियो पत्रकारिता गरेकी पत्रकार हुन् । उनले बीएफबीएस गोरखा रेडियो, सप्तकोशी एफएम लगायत बेलायतबाट सन्चालित नेपाली टिभी, गोरखा च्यानलमा रहेर पत्रकारिता गरिसकेकी छिन् ।

फोनिज युकेले गतवर्षदेखि बेलायतमा एक पत्रकारलाई सम्मान र एक पत्रकारलाई पुरस्कार दिन थालेको हो । गत वर्षको सम्मान हरिकुमार गुरुङ ‘काजी’ र पुरस्कार अमित थेबेलाई दिइएको थियो ।

यसबाहेक फोनिज युकेबाट नेपालमा पनि हरेक वर्ष एक पत्रकारलाई सम्मान र एक पत्रकारलाई पुरस्कार दिँदै आइएको छ ।