पहिचान पुरस्कार ‘थाङ्ग्रा’ र ‘जङ्क्सन पिपलबोट’लाई

लण्डन । पहिचान पुरस्कार कोषले २०७९ सालको ’पहिचान पुरस्कार’ प्रगति राईको उपन्यास ‘थाङ्ग्रा’ र प्रकाश गुरागाईंको कृति ‘जङ्क्सन पिपलबोट (नयाँसडकको कथा)’ लाई संयुक्त प्रदान गर्ने निर्णय गरेको छ ।
मंगलबार बसेको कोषको बैठकले जुरीवाट आएको निर्णयलाई आधार मानी उत्कृष्ट आठ पुस्तक मध्येबाट दुई कृतिलाई पुरस्कार दिने घोषणा गरेको हो ।
प्रगति राई लामो समयवाट महिलाको लागि वंश अधिकार र पहिचानको विषयलाई लिएर निरन्तर लेख्दै आइरहेकी छिन् । उनको आफ्नो कृति थाङ्ग्रामा जातीय छुवाछुत, महिलाको लागि वंश अधिकार र पहिचानको आवाजलाई बुलन्द उठाएकी छिन् ।
उन्मुक्त पुस्ता आन्दोलनको अभियन्ता मध्येको एउटा नाम हो, ‘प्रकाश गुरागाईं’। उनी पहिचान सम्बन्धी लेखन र पत्रकारितालाई संगसंगै वोकेर हिँडिरेका छन् । जङ्क्सन पिपलबोटले ६०/७० वर्ष अघिको साहित्यको इतिहासलाई खोतलेको छ । उनले राजनैतिक इतिहासलाई पनि यस कृतिमा केही मात्रामा समेटेका छन् ।
संस्थाले जनाएअनुसार, २०८१ साल बैशाख २२ गते भोजपुर जिल्लाको ‘टेम्के मैयुङ’ (रिमाचुङ सिलीचुङ) गाउँपालिका वार्ड नम्बर ४ को सुन्दर डाँडा चखियामा पुरस्कार वितरण गरिने छ । गतसाल पनि चखियामा नै पुरस्कार प्रदान गरिएको थियो । वैशाख २३ गते एक दिने ‘काब्य मुन्दुम पथ यात्रा’ गर्ने बताइएको छ ।