किरण पुनको हत्याको आशंकामा फार्नब्रोबाट तीन पक्राउ

लण्डन । बेलायतमा एक महिनादेखि हराइरहेका ३६ वर्षीय किरण पुनका बारेमा अनुसन्धान गरिरहेको प्रहरीले उनको हत्याको आशंकामा तीन युवालाई पक्राउ गरेको छ ।
ह्याम्पसायर प्रहरीले विहीबार बिहान सार्वजनिक गरेको प्रेस विज्ञप्तिअनुसार पक्राउ पर्नेहरुमा एक १७ वर्षीय किशोरका साथै २० र २१ वर्षका पुरुषहरु रहेका छन् ।
फार्नब्रोबाट पक्राउ परेका उनीहरु अहिले थुनामा रहेका छन् ।
प्रहरीले यसअघि नै अल्डरटबाट एक जना र फ्लीटबाट एक जनालाई पक्राउ गरी जमानतमा छोडेको छ । उनीहरुलाई मार्चसम्म हाजिर जमानीमा छोडिएको हो ।
डिटेक्टिभ इन्सपेक्टर आडम इडवार्डले किरण कहाँ छन् भन्ने बारेमा कडाइका साथ खोजिरहेको र उनी अल्डरसटमा देखिनु अगाडी र पछिका सूचनाहरुलाई जोड्न खोजिरहेको बताएका छन् । अल्डरसट स्टेशन वरिपरि केन्द्रीत गरेर खोजी गरिरहेको पनि उनले जानकारी दिएका छन् ।
उनले किरणका बारेमा केही सूचना भए प्रहरीलाई दिन पनि अनुरोध गरेका छन् । प्रहरीको फोन नम्बर १०१ मा फोन गरी रिफरेन्स नम्बर ४४२२०५१०९९२ उल्लेख गरेर वा क्राइमस्टोपर्समा ०८०० ५५५ १११ मा फोन गरी आफ्नो परिचय नखुलाई सूचना दिन सकिने छ ।
एम्सबरी निवासी किरण पुन डिसेम्बर १ तारिखका दिन अल्डरसट स्टेशनबाहिर बसबाट ओर्लिदै गरेको देखिएका थिए । त्यसपछि उनी बेपत्ता छन् । कालो छोटो कपाल, खैरो आँखा र पालतो अनुहार भएका उनको चिउँडोमा खत छ । उनी करिब ५ फुट ८ इन्च अग्ला छन् ।
प्रहरीले हालसम्म किरणको बारेमा सार्वजनिक गरेको सूचनामा चलाखी र सावधानीपूर्वक शब्द चयन गरेका छन् । सूचनामा एकातिर किरण जीवितै हुनसक्ने अनुमान गर्ने ठाउँ पनि दिइएको छ भने अर्कोतिर ‘हत्याको आशंका’मा पक्राउ भन्दा किरणको हत्या भइसकेको हो कि भन्ने शंका गर्ने ठाउँ पनि दिएको छ ।