एनआरएनएले प्रवासी नेपाली श्रमिकका लागि १० अप्रिलमा मानसिक स्वास्थ्य सचेतना कार्यक्रम गर्ने

काठमाडौँ । गैरआवासीय नेपाली संघ (एनआरएनए) ले प्रवासी नेपाली श्रमिकका लागि १० अप्रिलमा मानसिक स्वास्थ्य सचेतना तथा परामर्श कार्यक्रम आयोजना गर्दैछ ।

अन्तर्राष्ट्रिय श्रम संगठन (आईएलओ) सँगको सहकार्यमा प्रवासमा रहेका नेपाली श्रमिकहरूलाई लक्षित गर्दै भर्चुअल मानसिक स्वास्थ्य सचेतना तथा परामर्श सत्र आयोजना गरिन लागेको उपाध्यक्ष विश्वासदीप तिगेलाले जानकारी दिनुभयो । आयोजकका अनुसार उक्त कार्यक्रम साँझ ५ देखि ८ बजेसम्म (नेपाली समयअनुसार) जुम मार्फत सञ्चालन हुनेछ ।

कार्यक्रमको मुख्य उद्देश्य प्रवासमा रहेका नेपाली श्रमिकहरूलाई मानसिक स्वास्थ्यसम्बन्धी सचेतना अभिवृद्धि गर्नुका साथै आवश्यक परामर्श सेवा प्रदान गर्नु रहेको एनआरएनएले जनाएको छ ।

सत्रमा मानसिक स्वास्थ्यका विविध पक्षहरूबारे जानकारी दिइनुका साथै सहभागीहरूलाई प्रत्यक्ष परामर्शको अवसर समेत प्रदान गरिने जनाइएको छ। कार्यक्रममा सहभागी हुन इच्छुक व्यक्तिहरूले जुममार्फत https://zoom.us/j/93825703762..: Meeting ID: 938 2570 3762 र Passcode: 2026 प्रयोग गरी सहभागी हुन सक्नेछन्।

आयोजकले सम्पूर्ण सरोकारवालाहरूलाई कार्यक्रममा सक्रिय सहभागिताका लागि आग्रह गरेका छन् ।